uMthunywa
YiNtatheli kaMthunywa
IZIKOLO zikhangelelwe ukuvulwa ngamahlandla kumnyaka ka2021, lapho abafundi abazabhala imihloliso yabo lonyaka abazaqala ukufunda mhlaka 15 Mbimbitho kukanti abanye bonke bazavula mhlaka 22 ngenyanga efanayo.
Ababalisi abafundisa amakilasi azabhala imihloliso ekupheleni kwalonyaka bakhangelelwe ukuthi baye emsebenzini mhlaka 10 Mbimbitho kukanti abanye bonke kumele babe sebesezikolo mhlaka 17 Mbimbitho.
Izikolo zivalwe nyakenye mhlaka 18 Mpalakazi ngemva kokuvula isikhathi esifitshane. Izikolo bezikhangelelwe ukuvulwa mhlaka 4 Zibandlela ngaphambi kokuba uHulumende edlulisele phambili ukuvulwa kwezikolo kulandela ukukhuphuka kwenani labantu akade sebehlaselwe yiCovid-19.
Esazisa umphakathi ngokukhulunywe kukhabhinethi, uMphathintambo obona ngokukhitshwa kwembiko lokusakaza uMonica Mutsvangwa uthe emakilasini okunzima ukuthi abantwana batshiyelane umkhandlo bazabe betshintshana ukuya esikolo.
“Ikhabhinethi ivumelane ukuthi ikhalenda yezikolo ka2021 iqale ngezigaba ezincane, ababhalayo bavule mhlaka 15 Mbimbitho kuthi abanye bonke baqale mhlaka 22 Mbimbitho 2021.
“Ababalisi bamakilasi abhalayo kumele baye emsebenzini mhlaka 10 Mbimbitho, kuthi abanye bonke ababalisi bahambe mhlaka 17 Mbimbitho 2021,” kutsho yena.
UMphathintambo uMutsvangwa uthe ngamalanga abafundi bengekho esikolo, bazabe bephatheke ngamasu afana lokufunda bekhatshana kanye lange-e-learning kusetshenziswa ama-modules asenziwe.
Labo abaqhubeka ngezifundo kukhangelelwe ukuba baqale ngomsebenzi ka2020. Abafundi bemfundo yaphansi laphezulu bonke bazalandela amazinga amathathu e-syllabus ecindezelweyo ukuze kubelula ukuyiqeda.
