uMthunywa
ESINYE isangoma sesiphumele egcekeni saveza ukuthi okwenza abantu babulawe bacuywe yikuthi izitho zabantu zomzimba zithengwa ngezigidi zamadola.
Kungabe kunjalo sibili, ikakhulu nxa umuntu eligovu efisa ukuthi abe lenotho ngalindlela.
UGrace Ndlovu uthe ikhanda nje lomuntu lithengwa ngamamiliyoni amadola.
Amazwi kaGogo Ndlovu abuya ngesikhathi kweleZimbabwe kutholakale isidumbu sendoda sikhitshwe ubuchopho elokitshini leMzilikazi.
Ngaphandle kobuchopho, besingela mehlo kanye lendlebe.
Kusenjalo, isikhulumi samapholisa eGoli, uSergeant Dipuo Ditshego uthe kutholakale isidumbu sendoda eleminyaka engaba kubo 30 egcekeni eKempton Park duzane leGautrain Station.
“Sicubungula udaba lokubulawa komuntu njalo silindele impumela ye-post mortem.
“UGogo Ndlovu uthe ezinye inyanga ezilolunya yizo ezingcolisa inyanga ezilqotho.
“Zisebenzisa izitho zabantu zomzimba ukwenza okubi kanye lokuthwala,” kutsho yena.
Ubikele iphephandaba leDaily Sun ukuthi yonke ingxenye yekhanda lomuntu ilomsebenzi nxa kuhlanganiswa imithi.
“Bayaphambanisa umuthi batshiye imimoya emibi,” kutsho yena.
“Izangoma ezigangileyo ziyalaya abantu abadinga usizo kizo ukuthi babuye lani. Balakho ukutshela umuntu ukuthi alethe isitho somzimba sesihlobo sakhe esiseduze.
UGogo uthe izixwayiso ziyabe zicacile.
“Umuntu ngeke alethe ikhanda lowesifazana nxa kufuneka elomuntu wesilisa,” utsho njalo.
Uthe bakhona abafika kibo befuna ukuthuka izihlobo loba abangane njalo inyanga ezilolunya kazibaxotshi ziyabenzela lokhu.
“Kodwa-ke labo ababulalayo kabalakho ukuthula. Bayakhahlamezwa yimimoya yabafileyo. Lokhu kubafanele ngoba impilo yomuntu iqakathekile.
“Izihlobo ezilahlekelwa ngezimthandayo ngendlela lezi kuba nzima ukuthi zikwamukele ziqhubekele phambili ngempilo. Zilemibuzo eminengi lempendulo ezinlutshwana.”
