uMthunywa
YiNtatheli kaMthunywa
ZITHWELE amagabha avuzayo izakhamizi zeMashava eMasvingo ngodubo lokuswela amanzi nanko phela sezize zinatha amanzi emachibini osokudale ukuthi zihlaselwe yisihudo.
Kuzwakale ukuthi udubo lokuswelakala kwamanzi kule indawo luqale emavikini amabili adlulileyo ngemva kokutsha kwedamu akade benatha kilo.
Kuzwakale ukuthi ichibi leli abanatha kilo kwakuyindawo lapho okwakulahlwa khona ingcekeza yemgodini weGaths Mine.
UMthunywa uzwe ukuthi izakhamizi kanye labafundi abahlala eMashava basengozini yokuhlaselwa ngumkhuhlane wesihudo ngoba amanzi abawanathayo kukhanya kawahlambulukanga.
Elinye ilunga leKhomithi yezakhamizi zeMashava uMnumzana Godknowns Dube ubike ukuba amanzi la bawakha empompini okutsho ukuthi ayebe eke azanywa ukulungiswa ukuba kukhutshwe ingcekeza kodwa ayabagulisa loba kunjalo.
“Amanzi esiwasebenzisayo kulezinsuku asithwalise nzima, sihlala njalo nje sigijinyiswa yizisu labantwana sebehlala begula bephendukiswa esikolo.
“Loba ugeza ngawo amanzi la ayanquma umuntu aphenduke abemhlophe kube ngani ugeza ngawesibholaneni, lokho kuyasimangalisa ngoba besingakhangelelanga lokho,” kutsho uMnu Dube.
Intatheli ixhumane lesinye isakhamuzi sakule indawo esike salala phansi ngenxa yamanzi la, uCovenant Guragena obike ukuthi uselesikhathi engenelisi ukuya esikolo ngoba egijinyiswa yisisu njalo sebeze bebona kungcono ukunatha amanzi okuthengwa.
“Mina sengilamaviki amabili ngingawazi umnyango wesikolo ngenxa yomkhuhlane wesihudo. Lokhe saqalisa ukunatha amanzi emachibini kunzima ngoba izisu zethu zingani zihlala ziqumbile njalo lesibhedlela basipha amaphilisi okupholisa ubuhlungu kuphela kodwa kuyehlula sengize ngihlatshwa yisihlabo,” kutsho uMnu Gurajena.
UMthunywa ukhulume lomele iZimbabwe National Water Authority (Zinwa) uMnumnzana Mike Munyanyi othe beyehluleka uhlambulula amanzi kungakho abantu bacina besiyakukha emachibini alapho okwakulahlelwa khona ingcekeza ye-asbestos ayayisembiwa kulindawo.
“Amanzi anathwa eMashava khathesi angumhlobo we-hard water kungakho abantu abangayijayelanga ukuyinatha balakho ukuhlaselwa yisihudo.
“Kukanti awemachibini wona ale-acid engaba yingozi emzimbeni womuntu ngoba ilakho ukubangela umkhuhlane wamaphaphu ngoba elengcekeza yemitshana yemgodini owawusembiwa,” kutsho uMnu Munyanyi.
