uMthunywa
Yintatheli KaMthunywa
ZIDLELA evalweni izakhamizi zelokitshini lePumula East kanye leCowdray Park koBulawayo ngenxa yezigilamkhuba ezibamba abantu inkunzi nsukuzonke osekubangele ukuthi ezinye izakhamizi ziyephendukela esibhedlela seMpilo.
Kubikwa izakhamizi zemalokitshini la sezihlezi ziphethe izibindi ngezandla nxa zihamba ebusuku lemini ngenxa yezigebenga lezi okubikwa zitshiya ezinye zazo zibangwa lezibi.
UKhansila weCowdray Park uMnumzana Collet Ndlovu uchazele uMthunywa ukuba usethole imibiko eminengi yabantu abaganyulwayo ebusuku kunye lasekuseni nxa besiya emsebenzini.
“Sengamukele imibiko eyisithupha yabantu abaganyulwayo elokitshini leli. Lokhu kutshengisa ukuthi sekulokuganga okunengi elokitshini leli ngoba abantu abanengi baganyulwa bethathelwe impahla zabo ekuseni nxa besiya emsebenzini. Kukanti abanye balinyazwa ntambama nxa sebetshayisile emsebenzini.
“Ngeviki ephelileyo kulelinye inina eliganyuliweyo livela emsebenzini ntambama. Ngicabangela ukuthi abantu abenza ukuganga lokhu ngabahlala ezindlini ezingelamagetsi lapho okwazakala khona ngokuthi kuse-dark city.
“Umthelo wezindlu kuleyondawo uphansi ngoba yi$10 ngenyanga ngakho izigebenga ezinengi ezivela kwamanye amalokitshi sezihlala kulelilokitshi zisenzela ukuganga zingabonwa muntu ngoba kungelamagetsi. Ngenyanga edluleyo kulelinye futhi ipholisa elaganyulwa liphuma emoteni yalo ntambama,” kuchaza uKhansila uNdlovu.
UKhansila uNdlovu uqhubekele phambili wathi usezame ukudinga uncedo emapholiseni kodwa ukulinyazwa kwabantu kuyaqhubeka.
“Phose malanga wonke ngithola imbiko yabantu abalinyazwayo ebusuku. Amapholisa athi sibumbe i-neighbourhood watch committee ukuze kubanjwe izigelekeqe lezi. Siphakathi kokubumba leyo khomithi mhlawumbe lobu budlwangudlwangu bungaphela,” kulandisa uKhansila uNdlovu.
Kusenjalo uKhansila wePumula East uClyton Zano useveze ukuthi abantu elokitshini leli kabasakhululekanga ngitsho ngenxa yezigangi lezi.
“Kulabafana asebethwalise izakhamizi nzima ngokuzibamba inkunzi ekuseni lantambama, abanye sebeze bafika ebangeni lokuvula amafasitela besethula impahla emdulini ezinjengezikhwama, izigqoko njalo bayadonsa lengubo ngefasitela umuntu elele,” kubika uKhansila uZano.
Intatheli ixoxisane lomunye wezakhamizi zePumula East uMnumzana Bhekisisa Mlilo wabika ukuthi ngoMvulo weviki ephelileyo uthe evela emsebenzini wabanjwa inkunzi enkundleni yebhola eEast Rovers wathathelwa umakhalekhukhwini kunye lesikhwama semali.
“Ngithe ngivela emsebenzini ntambama ngehola lesikhombisa ngeviki ephelileyo ngahlaselwa liqula labafana bangithathela umakhalekhukhwini wami lesikhwama semali,” kuchaza uMnu Mlilo.
Esinye isakhamuzi uSihle Bhephe ubike njalo ukuthi ngoLwesine lweviki ephelileyo ifasitela livuke livulekile isikhwama esihlala incwadi eziqakathekileyo sitshontshiwe kunye lengubo yomntwana.
“Sithe sivuka ekuseni sabona ikhetheni liphephuka sethuka ukuthi kumbe silele sivule iwindi kanti ngamasela ngoba atshontsha isikhwama esihlala ama-phasipoti lezithupha kunye lencwadi zesikolo lengubo yomntanami,” kutsho uNkkz Bhephe.
UKhansila uZano ubike ukuthi sezinengi izehlakalo zokutshontshelwa lokubanjwa inkunzi elokitshini leli ikakhulu kuZone 4 ngakho sebenze imizamo yokuthi lababantu babanjwe.
“Kukanengi sibikelwa ngalezizigilamkhuba ezenza ukuthi abantu bahlale besesaba, into engiyazi mhlophe yikuthi ngabafana abahlala eduze abaziyo yonke into esigabeni njalo bahlala behlezi emabholohweni beswele okokwenza.
“Sesibikele amapholisa ngaloludaba ngakho benza imizamo yokuthi abafana laba babanjwe, amapholisa esigaba lawo seqalile ukusebenza njengakudala ukuze behlasele lezizigangi,” kutsho uMnu Zano.
UKhansila uZano uphethe ngokuthi ulesifiso sokuthi izakhamizi zisebenze ndawonye, ukuze baphange babambe izigilamkhuba lezi.
“Ngithanda ukucebisa abantu bePumula ukuthi bahambe bengamaqembu ukuze bengehlelwa yingozi yokubanjwa inkunzi njalo kungenzakala ukuthi omunye abanjwe baphange bamncedise,” kuxwayisa uKhansila uZano.
