uMthunywa
Thokozile Mbedzi
NGENHLOSO yokulwisa indlala izakhamizi zesigabeni seDumbura eGokwe sezihlanganise amakhanda ndawonye zaqala ukugamula lokulungisa insimu ukuze zilime ukudla kwesiphala senkosi.
Izakhamizi lezi zilime insimu engaba ngamahekitha ayisikhombisa ukuze kuphathiswe asebekhulile, abaphila lobugoga, intandane kanye lezihambi.
UMthunywa uvakatshele kule indawo lapho axoxisane lezakhamizi zakule indawo ngohlelo lokulima ukudla kwesiphala senkosi.
USobhuku Joel Musarirwa uveze ukuthi uhlelo lolu lokulima ngaphansi kwesiphala senkosi luzaphathisa kakhulu asebekhulile, abaphila lobugoga, intandane kanye lezihambi.
“Simanyene njengezakhamizi zakule indawo saxoxisana lenduna yethu ukuze siqale uhlelo lolu ngoba sinanzelela ukuthi kulabantu abaphila lobugoga, asebekhulile intandane kanye lezihambi bonke okumele bathole ukudla esiphaleni senkosi,” kulandisa uMnu Musarirwa.
UNkosazana Alice Mazivire uthe basebenza betshintshana kuloluhlelo ukuze labo babe lesikhathi sokulima kwawabo amasimu.
“Sivumelane njengezakhamizi ukuthi siyesebenza ensimini yesiphala senkosi siphana amathuba. Usobhuku losobhuku ulelanga lakhe labantu bakhe lokuyasebenza esiphaleni senkosi.
“Lokhu sakwenza ngoba sifuna ukuba lethuba lokusebenza emasimini ethu. Loluhlelo sibona ukuthi luzasiphathisa kakhulu ngoba wonke umuntu olodubo uqonda emzini wenduna,” kulandisa uNkszn Musarirwa.
Kuvele njalo ukuthi abephula umthetho esigabeni lesi bagwetshelwa ukuyasebenza ensimini yesiphala senkosi.
“Sikubone kufanele njalo ukuthi labo abaphambanisa amazilo lalabo abangela okokubhadala nxa belamacala basebenze ensimini yesiphala senkosi ngoba kuyasinceda ukuthi uhlelo lwethu luye phambili,” kutsho uNkosazana Mellisa Zimbwa.
Induna yakule indawo, uChiya Chireya income kakhulu izakhamizi zayo ngokubambana yaphinda yaveza ukuthi isiphala senkosi sizaba lusizo kwabaphila lobugoga, asebekhulile, intandane kanye lezihambi.
“Ngibonga abahlali bakule indawo ngokumanyana kwabo ukuze siqhubekele phambili ngohlelo lolu oluzasiza intandane, abagogekileyo, asebekhulile kanye lezihambi ngoba ngumlandu wethu njengezinduna ukuthi sibone ukuthi abantu laba bayanakekelwa.
“Insimu yethu ingaba ngamahekitha ayisikhombisa njalo ngikhangelele ukuthi sithole ukudla okunengi okuzaphathisa kakhulu abaswelayo,” kuphetha induna uChireya.
