uMthunywa
Langelihle Moyo
ABATHENGISA imithi yezifuyo lezilimo abeFarm and City sebexwayise abafuyi bembuzi ngokuqakatheka kokunakekela imbuzi zabo ngesikhathi sokutshisa.
UMnumzana Itai Shambambeva, oyingcitshi kwezempilakahle yezifuyo uxwayise abafuyi bembuzi ngokuqakatheka kokuzipha ukudla kunye lamanzi nxa kutshisa.
“Abantu abanengi bacabanga ukuthi imbuzi yisifuyo esingadingi ukunakekelwa ngoba siyazidlela emadlelweni njalo siyanatha amanzi loba ngaphi. Kodwa-ke ayisikho lokho, imbuzi ziyakudinga ukunakekelwa zikhathi zonke ikakhulu lasolesi isikhathi sokutshisa.
“Ngesikhathi sokutshisa imbuzi zidinga ukunanzelelwa ngamanzi ahlanzekileyo ikakhulu nxa kulembuzi ezilamabele. Amanzi ayazincedisa ukwentshisa.
“Amanzi lawa kumele athelwe phakathi kwenditshi abesemthunzini. Nxa kutshisa kakhulu amanzi embuzi kumele atshintshwe ngoba angahlala isikhathi eside ayabe esetshisa engasanatheki,” kuchaza uMnu Shambambeva.
“Lingazincitshi njalo lokudla loba nje nxa kutshisa imbuzi azidli kakhulu, okudingakala kakhulu ngamanzi. Okunye nanzelelani ukuthi ezibayeni zembuzi kuyangena umoya lokuthi kaziminyananga ukwenzela ukuthi kungene umoya.
“Imbuzi akuso sifuyo esizigqajayo kodwa lazo zidinga isibaya esilomthunzi lapho ezizacatshela khona izulu lelanga. Umthunzi lo uyancedisa lokuthi esibayeni kungabi lodaka ngoba imbuzi zilala phansi, ngakho-ke nxa kungaba lodaka kuzenza zicine zihlaselwa ngumkhuhlane wamasondo leminye imikhuhlane,” kulandisa uMnu Shambambeva.
Uphethe ngokuthi isibaya sembuzi kumele sibe sikhulu ngoba imbuzi zithanda ukudlala, okwenza zicine zingaselamanzi emzimbeni.
“Isibaya sembuzi kumele sibe sikhulu ukwenzela ukuthi imbuzi zenelise ukugijima zigcwale indawo yonke ngoba zithanda ukudlala.
“Imbuzi nxa ingabanjwa ngumkhuhlane wesihudo iyaphelelwa ngamanzi emzimbeni ngakho-ke kuqakathekile ukuthi zithole amanzi ahlanzekileyo ngaso sonke isikhathi,” kutsho uMnu Shambambeva.
Uphethe ngokukhuthaza abafuye imbuzi ukuthi nxa sokutshisa bazigele baphungule uboya bembuzi ukwenzela ukuthi zingatshiselwa kakhulu.
