uMthunywa
UMDENI wowesifazane weMthwalume, ufuna abolele ejele uyise wezingane okuthiwa umtshaye ngomphini wekhuba isikhathi eside, waphinde wamkhanda ngesando ngeSonto.
Isigameko kuthiwa senzeke eMahlongwa, ngaseMzinto, lapho umufi, uNksz Hlengiwe Dlamini, ebeseleminyaka ehlala khona lomsolwa lezingane zabo ezine.
Ilungu lomdeni kamufi, uNksz Mbali Gambushe, lithe bathole ukuthi umsolwa wenze lesi sigameko phambi kwezingane.
“Eqala ukumtshaya ngomphini wekhuba, bekukhona izingane zabo. Uthe lapho esezomtshaya khona ngesando, wazithuma ukuthi ziye esitolo, wasala wamqedisa,” kutsho uNksz Gambushe.
Uthe bathole ukuthi kuthe sezibuya esitolo izingane, umsolwa wazithuma kumfowabo, wathi azihambe ziyekuthi unina akasanyakazi.
“Ufike eshesha umfowabo, wafike wamthinta umufi kodwa waqaphela ukuthi usethule,” kutsho yena.
Uthe umfowabo uphume sengathi uyabuya kanti useyolanda amapholisa, wathi umsolwa uphinde wathumela izingane komunye umakhelwane ethi aziyotshona khona ukuthi ubona engasanyakazi umufi.
“Kuthiwa bamphendule ngelithi okutsho ukuthi umbulele ngoba bambonile emtshaya isikhathi eside,” kubeka uNksz Gambushe.
UNksz Gambushe uthe bafuna abolele ejele ngoba bese kulesikhathi emhlukumeza ngokumtshaya umufi aphinde asabise ngokumbulala.
“Umufi ubeze abuye eze ekhaya izikhathi ezinengi ngoba ebalekela ukuhlukunyezwa ngumsolwa kodwa aphinde amlande. Njengoba esegcine esembulele, sifuna umthetho udlale indima yawo,” kwenaba uNksz Gambushe.
Isishoshovu samalungelo abantu besifazane lezingane endaweni, uNksz Hlengiwe Gambushe, sithe kuyatshaqisa ukwenzeka kwezigameko ezifuze lezi ngesikhathi kuyizinsuku zomkhankaso wezinsuku ezingu-16 zokulwa lokuhlukunyezwa kwabesifazane lezingane ezweni.
“Kukhombisa ngokusobala ukuthi kusadinga sibhukule emphakathini silwe nalesi sihlava ngoba kusobala ukuthi akukenziwa lutho ukulwa laso,” kutsho yena.
Amapholisa agcine engakaphenduli ngokubotshwa kukamsolwa kulolu daba. – Ubulembu
