uMthunywa
Langelihle Moyo
ABATHENGISA imithi yezifuyo leyezilimo abe-Farm and City sebexwayise labo abafuye inkukhu, ukuthi banakekele inkukhu zabo babone ukuthi zisesimeni esihle ikakhulu ngesikhathi lesi sokutshisa.
UMnumzana Itai Shambambeva osebenza esitolo lesi, ololwazi ngempilakahle yezifuyo uthe ukuze umlimi athole imali kumele anakekele inkukhu zakhe abone ukuthi zilesilugu esiqondileyo njalo ziyathola amanzi lokudla okweneleyo.
“Balimi kumele lakhele inkukhu zenu izilugu ezibanzi ikakhulu ngalesi isikhathi kutshisa kangaka.
“Ezilugwini lezi kumele kube lezikhala ezingenisa umoya, ngaphandle kwalokho inkukhu ziyabulawa yikutshisa ikakhulu amatsiyane. Okunye njalo okuqakathekileyo yikuthi umlimi abone ukuthi inkukhu zakhe ziyathola amanzi lokudla okweneleyo,” kutsho uMnu Shambambeva.
Ubuye waxwayisa abalimi ukuthi bangesabeli khatshana ukuxhumana lalabo abazingcitshi kwezempilakahle yezifuyo, ukuze bafundiswe bathole ulwazi oluzabancedisa ekunakekeleni izifuyo zabo.
“Thina njengengcitshi zempilakahle yezifuyo siyenelisa ukunika umfuyi ulwazi lonke aludingayo mayelana lesifuyo asifuyayo ngakho kuqakathekile ukuthi umfuyi ahlale evakatshela kungcitshi kwezokufuya njalo abalimi abanengi bakhala ngokuthi inkukhu zabo zilezilonda.
“Kuloluhlupho umlimi uyabe emele akhangele indawo afuyela kiyo inkukhu zakhe ukuthi yindawo engelaminyane na ngoba izilonda zandise ukuthi zibe ngezemiyane. Eminye imikhuhlane ibangelwa yikungahlanzeki kwezilugu, ngakho-ke ngikhuthaza ukuthi asigcineni izilugu zethu zihlanzekile,” kutsho uMnu Shambambeva.
“Okunye okuqakathekileyo yikuthi umlimi engabona ukuthi inkukhu yakhe ayiphilanga kuhle adinge usizo masinyane ukuze athole umuthi umkhuhlane ungakaze umemetheke ucine usuhlasela lezinye inkukhu ezisesilugwini,” kuchasisa uMnu Shambambeva.
Ubuye wakhuthaza abalimi ukuthi banike inkukhu zabo ukudla okweneleyo ukwenzela ukuthi zenelise ukubekela.
“Balimi kumele libone ukuthi inkukhu zenu zithola ukudla lamanzi eneleyo zikhathi zonke, ngoba ukudla lokhu yikho okuzazincedisa ekubekeleni okuyikho okwenza umlimi athole inzizo.
“Okumqoka engingakutsho yikuthi inkukhu zilenzuzo emangalisayo, okubalulekileyo nje yikuthi umfuyi kumele azinakekele kuhle,” kuphetha uMnu Shambambeva.
