uMthunywa
Thokozile Mbedzi
KUBOTSHWE amasela amahlanu akoBulawayo abesehluphile ngokutshontsha kunye lokuhlukumeza uzulu enzikini yedolobho leli.
Amasela la, uNyasha Munjanja oleminyaka engu-29 yokuzalwa oweNkulumane, uNkosiyazi Mkhwananzi oleminyaka engu-29 yokuzalwa, uEdmore Sibanda oleminyaka engu-26 yokuzalwa oweNketa 6, uTony Ncube oleminyaka engu-20 yokuzalwa oweOld Pumula loDivine Ndlovu oleminyaka engu-20 oweNtumbane abotshwe kuviki ephelileyo njalo betheswa amacala okuhlasela abantu behlome ngamabhemba kunye lamahloka.
Kubikwa mhlaka 30 Mpandula phakathi kwamabili abahlanu laba bahlasela umamangala ephuma ePalace Hotel evela khelela uMagwebu behlome ngamabhemba kunye lamahloka.
Kubikwa abahlanu laba bamethusela bathi angala ukwenza abakufunayo bazambulala kungakho bamkhuthuza bamthathela umakhalekhukhwini wohlobo lweSamsung ebiza iR1 500, kunye le-wallet ele US$290.
Kuzwakale ukuba ekubuzweni kwakhe ngamapholisa, uMunjanja wawatshengisa abanye bakhe ababelokhu beqaphe ngelokhozi abantu ababezinathela endaweni le bengananzeleli.
Isikhulumi samapholisa koBulawayo uInspector Abednico Ncube uqinisekise ngodaba lolu.
“Amapholisa abophe amadoda abesehluphile edolobheni lakoBulawayo ngokutshontshela abantu.
“Ekuchwayisiseni kwamapholisa, kwavela ukuba amadoda la yiwo abehluthunela abantu izikhwama lenye impahla andubana bangene emoteni babaleke.
“Yibo njalo akade behlasela abantu ebusuku bebatshontshela bethembe ukuthi kumnyama. Bachaza njalo lamanye amacala angazange abikwe emapholiseni,” kulandisa uInsp Ncube.
uInspector Abednico Ncube
Uphethe ngokuxwayisa uzulu ukuthi atshiye umkhuba wokuthwala izikhali eziyingozi.
“Amapholisa axwayisa uzulu ukuba katshiyane lomkhuba wokuthwala izikhali njalo kabasebenzisane kuhle lamapholisa ngesikhathi esemsebenzini lapho emisa izimota bezihlola.
“Sithanda ukubonga uzulu ngokusebenzisana lathi ekulwiseni amacala,” kuphetha uInsp Ncube.
