uMthunywa
Wayne Ncube loEthel Ncube
KUBOTSHWE amasela enkomo amathathu okubikwa aqhube inkomo esuka layo emapulazini aze azongena layo elokitshini leMagwegwe North koBulawayo lapho afike ayingenisa endlini ayihlaba ayihlinzela phakathi.
Amasela la uGenuine Kunene (18), uSikhathazile Ncube (45) loTarget Ncube okungasatholakalanga iminyaka yakhe yokuzalwa kubikwa batshontsha inkabi e-Estate bucwadlana lelokitshi lePumula.
Kubikwa amasela la aqhuba linkomo phakathi kobusuku afika layo ngehola lesibili ekuseni lapho afika ayingenisa endlini kaSikhathazile Ncube bayihlohlela amalembu emlonyeni ukuze ingazwakali ibongolela andubana bayihlabe.
Intatheli zephephandaba likazulu zizwe udletshana lokuba uTarget osebenza e-Estate lomngane wakhe uKunene batshontsha inkomo kamakhelwane walapho uTarget asebenza khona, ebusuku ngehola lesibili bayiqhuba baya layo endlini kamasihlalisane wakhe uSikhathazile Ncube owaziwa ngokuthi nguNaMandlo.
UMthunywa ukhulumisane loMnumzana Dingani Sibanda obike ukuba kuliqiniso ukuthi kulenkomo eyahlinzelwa koNaMaNdlo endlini.
“Inkomo le yezwakala ngehola lika-2 ekuseni yadlula ngakwani ihamba ikhithiza ubulongwe obungamanzi indlela yonke. Asazi ukuthi babeyidlise muthi bani ngoba yayikhanya ukuthi iyalandela nje kuphela ingalwisi.
“Kulomunye umakhelwane kaMaNdlo uNaZa laye owayizwayo inkomo le ikhala ngo4 ekuseni. Uthi yena wacabanga ukuthi yimikhoba yelokitshini kungakho wesaba ukuphuma phandle,” kulandisa uMnu Sibanda.
Intatheli zizwe ukuba isigogo senkomo le sagoqwa safakwa phakathi kwesaka sayagejelwa esivandeni kwasekuhlayelwa umbhida phezulu kwathelelwa, igazi lagejelwa egodini, ongaziyo wayengeke abone ukuba kuhlinziwe endlini le.
“Kungenzeka ukuthi abantu laba bebengaqali ukutshontsha ngoba bebehlezi bethengisa inyama ezitshiyeneyo,” kutsho uSibanda.
UMthunywa uxoxisane lesinye njalo isakhamuzi esingazange sithande ukuqanjwa ngebizo esiveze ukuba uNaMandlo loTarget kukhanya bayezwana yiloba nje uTarget lo emncane kulaye ngeminyaka embalwa.
“Besibabona behlala bethengisa inyama singazi ukuthi ngeyokutshontsha. Okunye njalo abantu bathi uNaMandlo loTarget bayathandana, mhlawumbe yikho inkomo le ibuye yazohlinzelwa endlini yakhe,” kutsho lumfakazi.
Isikhulumi samapholisa uInspector Abednigo Ncube uthe kuliqiniso ukuba kulabantu abane ababotshwayo ngecala leli kukanti oyedwa lokhe esadingwa ngamapholisa.
“Amapholisa afika lapho okwabulawelwa inkomo eMagwegwe North abopha uGenuine Kunene loSikhathazile Ncube umninimuzi.
“Ngesikhathi bebotshwa uKunene waveza ukuthi enye inyama ikwabanye abathengisa labo uSaziso Moyo oleminyaka engu-69 kanye loSakheleni Makhuya oleminyaka engu-40. Bobabili labo sahle sababopha,” kutsho uInsp Ncube.
Ungezelele wathi ngesikhathi abasolwa bokuqala bebotshwa kwatholakala imisila emibili yenkomo okutshengisa ukuba lokhu bekungayisikho kokuqala ukutshontsha.
“Abantu nxa bedala macala kumele bazi ukuthi isandla somthetho sizabafinyelela kuphela bajeziswe,” kuphetha uInsp Ncube.
