uMthunywa
Thokozile Mbedzi
NGEMVA kweminyaka behamba imango emide besiyadinga ukwelatshwa esibhedlela seZezani, izakhamizi zesigabeni seWhunga kuWadi 10 eBeitbridge sezihlanganise amakhanda zabopha iqhinga lokuhlanganisa imali ukuze zakhe ikilinika.
Kubikwa izakhamizi lezi bezihamba umango ongaba ngamakhilomitha aphakathi kwamatshumi amabili kunye lamathathu ukuze ziyothola usizo lwezempilakahle esibhedlela seBeitbridge.
Kubikwa izakhamizi lezi, zaqala ukukhulumisana ngokwakha isibhedlela ngomnyaka ka-2015 kodwa wangaphumeli kuthe nyakenye zaqala ukubuthelela imali zaqala umsebenzi wokwakha isibhedlela lesi.
Kuthe nyakenye zaqala ukubuthelela imali zaqala umsebenzi wokwakha isibhedlela lesi.
Ekhuluma lentatheli kaMthunywa uMgcinisihlalo wekhomithi ebona ngokwakhiwa kwesibhedlela lesi, uRatang Mleya uthe ulokujabula okukhulu ngendlela izakhamizi ezisukumele phezulu ngayo ukuze kwakhiwe isibhedlela endaweni yakibo.
“Ukwakhiwa kwekilinika le kuzaphathisa kakhulu kwezempilakahle endaweni yakithi ngoba abantu bebehamba umango omude ukuze bayekwelatshwa. Abanye bebehamba ama-20km abanye ama-30km obekusenza kubenzima ukuthi abanye baye esibhedlela ikakhulu nxa bephatheke kakhulu.
“Ngibonga njalo lezakhamizi ngokuzinikela kwazo emsebenzini lo. Ngilokujabula okukhulu ngendlela izakhamizi ezisukumele phezulu ngayo ukuze siqale uhlelo lokwakha isibhedlela lapha.
Uqhubekele phambili esithi inkampani yeSimbisa Brands yaphinda yabathengela esinye isamende.
“Senza umhlangano savumelana ukuthi imizi emithathu kumele ihlanganise imali ithenge isamende esisodwa senelisa ukuthola amasaka angu-277 satshaya izitina ezingu-85 986,” kuchasisa uMnu Mleya.
Uqhubekele phambili esithi inkampani yeSimbisa Brands yaphinda yabathengela esinye isamende.
“Inkampani yeSimbisa Brands yasithengela izamende ezingu250, ama-door frames angu-20, amabhara amabili, amafotsholo amabili, amapiki amabili kunye lama-window frames angu-11 kunye lama-brickforce angu-10.
“Sathola njalo izamende ezingu-20 ezasuka kuMnumuzana Likang Sijiye lezinye ezingu-30, lama-reinforcement kwabeCDF.
“Ekwakheni sincediswa ngamasotsha esathi sesihlanganise impahla yokwakha sathi sidinga abakhi indleko ababezifuna zasikhama kodwa amasotsha yiwo asesakhela,” nguMnu Mleya lowo.
“Sicela uzulu asiphathise ngoba kasikaqedi ukwakha, kusamele sifulele kodwa kasikabi layo leyompahla yokufulela. Sicela abangasiphathisa basisize sifeze izifiso zethu njengezakhamizi,” kulandisa uMnumzana Mleya.
UMnumzana Mbulawa Mazibeli uthe balokuthokoza ngengqubela phambili eyenzakalayo.
“Ngiyathaba ngengqubela phambili eyenzakale endaweni yakithi. Sesileminyaka eminengi sifisa ukuthi sibe lesibhedlela endaweni yakithi ngoba abantu bahamba imango emide besiya kwelatshwa esibhedlela seZezani.
“Lokhu kusuka kubenzima kulabo abangela nqola loba obabhemi ekuhambeni umango lo.
“Sicela uzulu asiphathise isibhedlela sethu siphele ngoba uHulumende uyasiphathisa ngikhuluma nje ababebutho bayasincedisa ngokwakha,” kuphetha uMnu Mazibeli.
