uMthunywa
Bongani Ndlovu
ABALIMI sebekhuthazwe ukuthi bathakazelele ukufuya inkukhu zesintu ukuze kuthi kusiyafika isikhathi seKhisimusi zibe sezikhulile sezithengiseka.
Ekhuluma loMthunywa uMnumzana Cosmas Muzunde onguLivestock Specialist esabelweni seMatabeleleland North uthe kulicebo elihle ukuqala ukufuya inkukhu zesintu khathesi.
“Sikhuthaza abalimi ukuthi bafuye inkukhu zesintu ngoba besesebalutshwana abalimi abagxile ekuzifuyeni, lokhu sokwenze ukuthi inyama yenkukhu zemakhaya ibelentengo ephezulu kungakho sikhuthaza abalimi ukuthi bafuye inkukhu zohlobo lolu.
Lokhu kuzakwenza ukuthi abalimi bazuze imali njengoba inengi labantu beyithanda njalo beyidinga kakhulu,” kuchaza uMnu Muzunde.
Uqhubekele phambili ngokweluleka abalimi ethi umkambo wenkukhu ubanzi ngokusondela kwekhefu leKhisimusi.
“Umkambo wenyama yenkukhu ubanzi ngesikhathi seKhisimusi ngoba abantu abanengi bayabe befisa ukuzithokozisa ngakho inyama yenkukhu yisitshebo esithakazelelwa linengi labantu ngaleso sikhathi njalo langentengo ezenyuka nsukuzonke kwenza umkambo wenkukhu ubebanzi,” kuchasisa uMnu Muzunde.
UMnu Muzunde uphinde wathi okwenza umkambo wenyama yenkukhu zesintu ubebanzi yikuvulwa kwezindawo ezipheka iGango kanye lamahotela.
“Ukuvulwa kwezindawo ezipheka iGango sokwenze ukuthi umkambo wenyama yenkukhu ubebanzi ngoba kungenye yenyama ezifakwa kuleso sitshebo. Ngakho umlimi ofuya inkukhu kasweli mkambo,”
“Amanye amahotela amakhulu athenga lezonkukhu ngoba bethi ziyenza isitshebo esihlabusayo lapho zithole umuntu opheka ngendlela efaneleyo,” kuchaza uMnu Muzunde.
Uphinde wathi ubuhle benkukhu lezi yikuthi kazihluphi ukufuya.
“Inkukhu lezi ziyenelisa ukuthi ziziphandele ukudla njalo lokudla ezikudlayo akuduli, amabele, i-sunflower, umumbu kanye lomuhlwa otholakala ezidulini. Inengi lazo ziyakhula kuhle, kazidingi mithi ukuthi zingezelelwe ukukhula njalo kazihlaselwa yimikhuhlane mahlayana nje,” kuphetha uMnu Muzunde.
