uMthunywa
Blessing Moyo
ABALIMI bakhuthazwa ukuthi benze i-cross breeding ukuze bathole imihlobo etshiyeneyo yenkomo futhi elesisindo esingcono okwenza abalimi bangakhangeleli kumhlobo munye wesifuyo.
UMnunzana Cosmas Muzunde onguLivestock Officer ubikele uMthunywa ukuba abalimi kumele bahlanganise inkomo nge-cross breeding ukuze babe lenkomo ezilesisindo.
Uthe i-cross breeding umlimi engathatha inkomo enduna afuna umhlobo wayo ayihlanganise lensikazi kumbe njalo umlimi engenza okuthiwa yi-artificial insermination kodwa okungelandleko ezinkulu yikuthi umlimi athenge inkomo enduna.
“I-cross breeding yindlela yokuthatha inkomo enduna yakwamanye amazwe uyihlanganise lenkomo ensikazi yakuleli. Lokhu kwenza umlimi athole inkomo engomunye umhlobo.
Okunye njalo umlimi engathatha inkomo enduna kulezi ezifuyelwa inyama ayihlanganise lensikazi kulezi ezifuyelwa uchago. Inkomo ezalwa ngemva kokuhlanganiswa kwemihlobo le yomibili yehlisa ngcono.
“Lesi ngesinye sezizatho zokuba umlimi enze i-cross breeding ngoba uchago azabe eseluthola luyabe selulunengi selulakho ukutholisa umlimi imali enengi,” kutsho uMnu Muzunde.
Uqhubeke echaza njalo ukuba i-cross breeding ikhipha umhlobo wenkomo ongabanjwa lula yimikhuhlane.
“Imihlobo yenkomo ezalwa ngokwenza i-cross breeding ayibanjwa yimikhuhlane masinyane ngoba iyabe izalwe yinkomo yakuleli yona engumhlobo wenkomo engabanjwa lula yimikhuhlane njengezakwamanye amazwe.
“Ngakho sikhuthaza abalimi ukuba baphatheke kakhulu ekwenzeni i-cross breeding ukuze bathole inkomo zochago eziqinileyo futhi ezehlisa kakhulu ukuze bathuthukise amabhizimusi abo ochago,” kuphetha uMnu Muzunde.
