uMthunywa
YiNtatheli kaMthunywa
ABAFUYI benkomo esabelweni seMatabeleland South sebezakhipha imali encinyane yokuthenga ukudla kwezifuyo kulandela ukwehliswa kwentengo yokudla ngesikhathi isizwe sibhekane lokoma komumo womkhathi.
Lokhu kuza ngesikhathi ugatsha lwezokulima kuHulumende lubambene lenhlanganiso yeFood and Agricultural Organisation (FAO) kuhlelo lokuncedisa abafuyi benkomo ukuthi bathole ukudla okuzasiza izifuyo, ikakhulu inkomo kulesi isibelo esiphethe umhlambi wenkomo zesizwe.
Iphephandaba likazulu lizwe ukuba abafuyi benkomo sebezathenga isaka le50kg nge$8 kuthi labo abathenga i5kg yokudla kwe-cowpeas bazathenga nge$2.
Izigaba ezizaphathiswa kuloluhlelo zibalisa iGwanda, Insiza, Bulilima leMzingwane njalo indawo lezi seziphiwe i600 tonnes yokudla kwezifuyo okukhangelelwe ukuthi kuphele ngoMabasa ka2017.
Ingcitshi yezokulima kugatsha lukaHulumende uMnumzana Morris Muchemwa uthe uhlelo lolu ngolokuncedisa ukuthi abalimi bayengeze ukudla kwenkomo zabo.
Kusiyafika inyanga kaMfumfu, ugatsha lwezokulima lubika ukuthi kulenkomo ezedlula i1 500 kulindawo. Isigaba esihlaselwe kakhulu kubikwa kungeseMatobo.
UMnu Muchemwa uthe bahlose ukunceda lalabo abalesibaya esilenkomo ezinlutshwane.
“Abafuyi benkomo bazaphathiswa okumangalisa kuhlelo lolu oluhlose ukuthi luvuselele isibaya senkomo esabelweni seMatabeleland South. Kulandela ukoma komkhathi okubangele ukusilela kwamanzi lamadlelo, uHulumende ukubone kufanele ukuthi abafuyi balapha bathengiselwe ukudla kwenkomo ngentengo ephansi,” kutsho uMnu Muchemwa ekhuluma lentatheli yephephandaba likazulu.
