Yakhelani imbuzi izibaya ezintsha

11 Feb, 2021 - 00:02 0 Views
Yakhelani imbuzi izibaya ezintsha

uMthunywa

Thokozile Mbedzi
INHLANGANISO ebona ngempilakahle yezifuyo eyeVeterinary Services isixwayise abalimi kundawana zonke zelizwe ukuthi bakhele imbuzi izibaya ezintsha ezifulelweyo ukuze zingahlali endaweni emanzi.

UDokotela weVeterinary Services uDokotela Pollex Moyo ukhuthaze abalimi ukuthi bakhele imbuzi zabo izibaya ukuze zingahlali lapho okumanzi khona ngoba lokhu kucina kubangela ukuthi zibole amasondo.

UDkt Moyo uthe njengoba izulu lisina abalimi kababone ukuthi imbuzi zabo zilala endaweni ewomileyo.

“Abalimi kabazame ukuthi bakhele imbuzi izibaya ezinganetheliyo ukuze zingaboli amasondo ngoba nxa zingahlala lapho okumanzi khona phansi zicina zisiba lezilonda.

“Ngesikhathi lesi sezulu abalimi kumele bananzelele kakhulu ukuba imbuzi zabo zilala lapho okungela bumanzi khona. Imbuzi nxa zingadabuka amasondo kubangela ubuhlungu zicine sezisiba leminye imikhuhlane okwenza umlimi acine esiba lendleko ezinengi eseselaphisa imbuzi,” kuchasisa uDkt Moyo.

Uthe izibaya lezi zingakhiwa zifulelwe loba ngamahlanga, utshani loba omazenge kusiya ngendlela umlimi athola ngayo.

Uphethe ngokuthi ukugcina imbuzi endaweni ewomileyo njalo ehlanzekileyo kulethela umlimi inzuzo enhle.

“Imbuzi ezihlala esibayeni esingeladaka kazilali egangeni kungakho lokhu kwenza umlimi angalahlekelwa yinzuzo yakhe ngoba imbuzi zakhe nxa ilanga litshona ziyakhumbula ngakibo lapho okulendawo enhle khona,” kuphetha uDkt Moyo.

Share This:

Sponsored Links