uMthunywa
Raymond Jaravaza lo Lorraine Mathe
UNGENZANI nxa umuntu engakondlisa umntwana okweminyaka engu-11, uthole ukuthi kasi wakho?
Lokhu yikho okuvelele omunye udokotela wakoBulawayo omangalele usaziwayo uNatasha Popova Sibanda, emethesa icala lokumqambela amanga okuthi unguyise wendondakazi yabo.
UNatasha wake waduma engumlimgisi kumdlalo othi “Amakorokoza” kumabonakude ka-ZBC. Okwamanje uNatasha kubikwa uhlala phetsheya kwelizwe.
UDokotela uRoger Kruger Hendrick Chigangacha uveze inani lemali ayisebenzisa esondla umntwana lo, yafika ku-US$163 000. Ubike ukuba useyifuna imali le.
Lokhu kuvele kumasamanisi ethulwe ngamangqwetha kadokotela Chigangacha, iMashayamombe and Company Attorneys, emthethwandaba weHigh Court koBulawayo, ngaphansi kwenombolo ethi HC51/23.
Amasamanisi la afakwe mhlaka 20 Zibandlela 2023.
Kubikwa ngomnyaka odluleyo, ngoMpalakazi, uDkt Chigangacha lendodakazi “yakhe” okwavela ukuthi kasi yise womntwana.
Kumaphepha asemthethwandaba, uDkt Chigangacha uthe isenzo sikaSibanda simehlise isithunzi.
“Mhlaka 19 Zibandlela 2022, kwenziwa i-DNA kimi lasemntwaneni, impumela yangikhipha ngaphandle njengoyise. Kwakumele umamangalwa akubone ngaphambilini ukuthi ukuziphatha kwakhe ngesikhathi ezithwele kwakuzadala ukuthi ngiqanjelwe amanga ngokuthi yimi uyise womntwana,” kutsho uDkt Chigangacha.
Uthe ufuna umthethwandaba utshele uSibanda ambhadale iUS$100 000 yokumphoxa ngesenzo sakhe.
Ufuna njalo ukubhadalwa iUS$63 000 ayisebenzisa esondla umntwana.
Kubikwa wathi ebeletha, uSibanda wavumela ukuthi uDkt Chigangacha anikeze umntwana ibizo.
Uthe bobabili babethandana ngaphandle komtshado kusukela 2011 kusiya fika ngoNhlangula. Umntwana wazalwa mhlaka 20 Nkwenkwezi 2012.
USibanda kaqalisi ukuba segudwini nanko wake wahanjiswa emthethwandaba nguTholakele Ncube, unkosikazi kaDkt Chigangacha, emangalelwe ngokufuna ukubhidliza umtshado.
Ngaleso isikhathi, uSibanda kubikwa wayefunga ukuthi uTholakele Ncube kumele avume ukuthi uDkt Chigangacha yindoda yabo bonke
