uMthunywa
Gladmore Ncube
KULEJAHA lelokitshini leTshabalala koBulawayo elethulwe entanjeni selizibophela lasila ekufeni kuviki edluleyo lifuna ukuzibulala isizatho siyikwaliwa yintombi.
Kubikwa ukuthi uMnumzana Ngonidzashe Mhofu uphose wafa kuviki edluleyo ngemva kokwaliwa yintombi yakhe uNkosazana Duduzile Msipha.
Intatheli ikhulumisane lokhethe ukwaziwa ngokuthi Nkosazana Ngwenya nje kuphela oloje ngakibo kajaha lo othe wezwa kulomsindo ephahleni okwenza wayakhangela wathola uMhofu eselengile umzimba uqhatsha.
“Ngezwa kulomsindo omkhulu angathi amapulanka endlu afuna ukuqamuka ngagijima ngaya khangela endlini ngathi ngithi mehlo suka endlini kaMhofu yokulala ngathola elengile eseqhuqha kakhulu njalo esezitshiyile ibhulugwe limanzi te.
“Ngahlakanipha ngathatha ingqamu masinyane ngayiquma ngasengimlalisa embhedeni ngabiza abantu babuya bambizela imota eyamusa esibhedlela.
“Kungayisikho ukuthi ngaphangisa ukufika kuye ngangizamthola esefile ngoba wayeseqhatsha okwakutshengisela ukuthi kwasekusele imizuzwana nje ukuthi umoya uphume aphele,” kuchaza uNkszn Ngwenya.
Iphephandaba likhulumisane loNkszn Msipha obike ukuthi uMhofu wayehlezi emethusela esithi engamala uzazibulala.
“UMhofu sileminyaka emine sithandana kodwa ubengihlukuluza kakhulu ehlala engitshaya. Ngingamala uyabuya ezobanga umsindo ngakithi.
“Sakhuluma ngaloludaba wathi kasoze akwenze futhi ukuhlala ebuya ngakithi ezobanga umsindo nxa salene kodwa wathi ngingasamali ngoba engazibulala.
“Mina ngazitshela ukuthi uyadlala ngoba vele banengi abadlala ngokuthi bayazibulala nxa bengaliwa zintombi besoma. Saxabana ngamala wangincenga ngala ukumxolela. Alitshonanga ilanga ngezwa kuthiwa bamgijimisele esibhedlela ngoba ubezama ukuzibulala,” kuchaza uNkszn Msipha.
Intatheli ikhulumisane loNkosikazi Mhofu umama walelijaha othe umangele ukuthi indodana yakhe ibingenwe yini ize ithathe isinqumo esibi kangaka njalo intatheli ngeke yenelise ikhulume laye ngoba usesibhedlela.
“Umntanami kakho usesibhedlela. Indaba le ibuhlungu, ngihlala ngizibuza njalonje ukuthi kanti ube engenwe yini aze anakane ukuzibophela. Ukukhulumisana laye ngeke wenelise ngoba khathesi usesibhedlela njalo angiboni kulungile ukuthi umbuze ngakho lokhu ngoba uyafuthelwa khathesi,” kuchaza uNkkz Mhofu.
Intatheli ikhulumisane lomunye wezakhamizi zakule indawo uMnumzana Talent Mabhena othe kumzwisa ubuhlungu ukubona ijaha elihle lifuna ukuzibulala ngokwaliwa yintombi kuphela.
“Ngizwa ubuhlungu kakhulu ngomfanyana lo okhetha ukuthi athathe umphefumulo wakhe ngoba eyaliwe yintombi. Lentombi yakhona le ayisiyo lamfazi wakhe.
“Thina sesikhulile saze sabangaka kodwa ayisikho ukuthi lathi ekukhuleni kwethu sasingaliwa kodwa nanko lokhe siphila lakhathesi. Kodwa nje yikuthi umuntu nxa sethe wakhetha akufunayo akula muntu ongamvimbela ngoba uyabe esezimisele,” kutsho uMnu Mabena.
