uMthunywa
IKHISIMUSI isifike yedlula! Siyabonga ukufikiswa kulolusuku siphila. Sesikhangelane lentuba yomnyaka omutsha.
Kwabasitshiye ngesikhathi sokulungiselela ikhefu, kulelikhefu ngokwalo lasemuva kwalo, sithi lalani ngoxolo zihlobo. Isifiso sethu bekuyikuthi siqhubeke sisonke! Kungaselani, kasiyeni phambili sithandazela imiphefumulo yethu. Sivikele izingozi, imilandu lezono phakathi komphakathi ukuze silondoloze ukuthula, intokozo lenhlalakahle.
Ngesikhathi sikukhefu, sithakazelela umanyano, ukuzalwa kukaJesu, ukuhlanganyela lezihlobo, abangane, omakhelwane labanye abantu; ngokudla, izipho, imicimbicimbi, imidlalo, imidanso, inkonzo lokunye okwehlukeneyo; amasela abephithizela lawo etshontsha, yeyi madoda! Isibonelo sobanjwe edinga imali yeKhisimusi ngokweba, nguDarlington Ncube oleminyaka engu-27 ubudala.
UNcube yisakhamuzi seMatetsi esigabeni sikaMnumzana Elias Mudenda eJambezi. Kubikwa uDarlington ubelomkhuba wokugada aye edolobheni leHwange. Athi esekulelodolobho, alandelele izimota ezipakwe emagalajini angavalwanga kumbe angakhiywanga. Ubefika kulezozimota ngobusuku, akhuphe ama-bhatri ikakhulu awohlobo lwe-Exide. Ngemva kwalobo busela, ubenyamalala abuyele ngakibo eJambezi okungamakhilomitha eqa ku-80 usuka edolobheni leHwange.
Esengakibo, kubikwa uNcube ubethengisa impahla le ebantwini bakuleli labaseZambia lapho isigaba sabo esingcelane khona lalelolizwe. Angathengisa aqede, aphenduke ukuzakweba amanye futhi eHwange. Impi yomanyano kazulu lamapholisa ikwalile-ke lokho yakhetha ukumupha isifundo uNcube ngokumzingela ngitsho lasemilindini, yaze yamjimba. Esebotshiwe, uNcube uphathisane lamapholisa ukukhomba izindlu lapho atshontsha khona kunye lalapho athengisela khona limpahla. Abacuphi beCriminal Investigation Department (CID) bavumbulule impahla ebiza phose $400-00 egoqela ama-bhatri amane lokunye okwakutshontshwe nguNcube ebantwini.
Kunzima-ke bakwethu ukuphila ngembilaphi zabanye. Njengesixwayiso sethu emavikini aphelileyo sikhuthazana ukuthakazelela iKhisimusi siphandle kwejele, kwalile kuNcube.
Mahlabezulu, zinengi izifundo esilazo kumzekeliso lo. Ezinye zakhona yilezi:
n Ukutshontsha kubi kumenzi lomnikazi wempahla etshontshiweyo. Sikhuluma kunje nje, abantu abebefuna ukwethekelela kwezinye indawo besebenzisa izimota ezatshontshelwa amabhatri la kabasaphumelelanga kumbe bacina betshona esikhwameni ngendleko ababengazikhangelelanga. U-Darlington, usesejele. Bonke lobo yibubi becala. Lamuhla indawo yeJambezi isingabukeka sengathi ilamasela ngesenzo somuntu munye ngoba zivele zonelwa mvunye.
-Lanxa kwezinye izindawo ukutshontshelwa impahla yezimota (car parts) kungandanga, silikhuthaza ukuvikela inotho lempahla yenu yonke ngokukhipha ama-bhatri la nxa lisiyalala — lapho elingenelisi khona ukukhiya / ukuvala amagalaji enu. Okweneliseka khona, valelani impahla yenu le yonke ngokufaneleyo.
-Impahla efana lale, layo yonke engatshontsheka, kasiyibekeni uphawu olwehlukene le-serial number. Lube sendaweni ecatshileyo eyaziwa ngumnini waleyompahla yedwa ngoba amasela alomkhuba wokucitsha impawu zonke lezi ejonge ukutshabalalisa ubufakazi.
-Omunye umhlobo wempahla etshontshwa kakhulu kulezi insuku zinwele (hair piece). Kukhanya kulalapho ethengwa khona kakhulu. Uhlupho olubakhona ngolokuthi inwele lezi ziyafanana xathu — oRihanna, Daniella lezinye ezinjalo.
Ukuthi uyekuma phambili kukamantshi emthethwandaba usithi ngibambe uNdaba elenwele lezi engicabangela ukuba uzitshontshe esitolo sikaNdabakazi, kunzima ngoba kazilaphawu olubalulekele uNdabakazi yedwa qha!
Kuhle-ke ukubeka uphawu oluzaphathisa wonke umuntu, ukuqamba impahla yakhe, ukutshutshisa o“tsotsi” lokwengeza inani lempahla ezivunjululwa ngemva kokwebiwa (property recovery rate) — okungumsebenzi womanyano kazulu lamapholisa.
Nxa sikhuluma ngempahla ezivunjululwa zitshontshiwe, izibonelo ngezilandelayo:
i. I-laptop yohlobo lweDell ebitshontshwe koBulawayo emoteni ekade ipakwe yakhiwa edolobheni. Kubikwa isela lisike elinye lamafasitela emota anduba libe leyompahla ebiphakathi kwesikhwama.
ii. KoBulawayo, elokitshini leMagwegwe, kulesela ebelitshontshe imota yohlobo lweHonda Fit ebipakwe egumeni. Abacuphi baphenye bajula, baze bamtshisa u“tsotsi” lo bavumbulula lemota le ebiza $3 100.
Liyakubona-ke bakwethu ukuba amasela kaphumuli ngakho lathi kumele sihlale siqaphele.
Lisale, silifisela u2018 olempumelelo, izibusiso, intokozo lokuthula.
Feedback- [email protected]
