uMthunywa
Silo Cornelius Luphahla
BAKWETHU ithendele elihle ngelikhala ligijima ngakho ngithanda ukulikhuthaza bodadewethu ukuthi lihlale liqaphe eqolo njengonwabu ngoba lingahlala lingaqaphanga lizasala libambe iziboya sebetshaye utshani abafana. Lani liyazibonela ukuthi inengi lenu lisala likhala ngemva kokudlalwa ngabafana libhekile. Kungcono ukuthi ilihlo lixhotshwe likhangele kulalokhu okwenziwa linengi lenu.
Ngikhuluma nje inengi lamantombazana liyakhala manje liphethe abantwana abangaziwayo lezibongo zabo okuthiwa abala boyise. Kambe kungazalwa njani umntwana engelayise bakithi? Angithi lenkomo ukuze izale ithole kufanele kube lenkunzi noma nje ingaba ngumjanja kodwa iyalizala ithole.
Isimanga yikuthi inengi lenu aliboni isibonelo kubosowenu kodwa lisuka linindwe ngolaza emehlweni ngabafana. Basuka balithembise izulu emhlabeni, lapho lani lihle lingasabambeki. Ngemva kwalokho uthola intombazana isiqhuba isisu phambili ijaha selitshaye utshani.
Kwakuthi nxa likhuzwa ngabazali benu lisuke limile amahlwayi lifane lobabhemi lingazi ukuthi abafana balenza ubabhemi wakoNkohlo. Ngemva kwalokho intombazana ingaba lomntwana, abafana bayabe sebeyibiza ngebizo lenkomo elithi, “izalakanye”.
Kwelinye ilanga ngake ngathi ngizama ukubonisa omunye untombazana oyisihlobo sami mayelana lengozi yesikhombe khombe kanti ngizigwaza ngowami. Wavuka umntanabantu wazonda waginqa tshitshi. Nango esuka ehamba enyamalala etshiya ebhale incwadi ethi bengimhlupha ngakho usesiyazibophela.
Kuthe kusasa ilanga lingakaphumi elakusasa wabesethutshile unina engasadlanga nkotshana. Wakhohlwa lokuthi ngubabakazi, wangiyolula wangitshela engakudla ngesikhathi sendlala. Watsho lokuthi kufanele ngiyemdinga umntanakhe, ngemva kwalokho waphuma engavalelisanga ethi uya emapholiseni. Ngaphelelwa ukuthi ngenzeni ngaphetha ngokuzimisela konke okuzakwenzakala.
Ngemva kweviki waphenduka untombazana lo, mina sengitshitshe emapholiseni ngaze ngatshona inyawo esiswini. Kangizange ngibuze lokuthi ngabe uvukile yini emathuneni okuzibophela. Lobabakazi kazange angibikele lokuthi umntwana uthe uvela ngaphi njalo ubuye nini.
Ngemva kwenyanga ezintathu kwasokuzikhanyela ukuthi usezithwele. Salinda phela ukuthi sibone umkhwenyana kodwa phinde. Ubabakazi waswela ukuthi uzasibikela athini, kuze kube namuhla umzawami ulomtwana okuthiwa kalayise.
Ngalokhu ke ngiyalikhuthaza bodadewethu ukuthi liqaphele amajaha ngoba amazwi awo aluluju kodwa isiphetho bayababa njengesihaqa. Ngiyathi inengi lizathi lizabona angathi ngilomhawu, kodwa ongakulaleliyo lokhu engikutshoyo uzatsha okamazokhela, njalo kakho ozamzwela ngoba umzenzi kakhalelwa. Vulani amehlo mantombazana lizigqaje ngobuntombi benu njengentombi zayizolo.
