uMthunywa
Langelihle Moyo
ABABONA ngempilakahle yezifuyo abe-Veterinary Services sebexwayise wonke umlimi ofuye imbuzi lezimvu ukuthi avikele izifuyo lezi emkhuhlaneni we-Foot rot ngalesi isikhathi kusina izulu kwezinye indawo zelizwe.
UNkosazana Maria Jakarasi oyingcitshi kwezempilakahle yezifuyo osebenza eVeterinary Service esabelweni seMatabeleland North uxwayise abalimi ukuthi baqaphele umkhuhlane weFoot rot ohlasela imbuzi lezimvu ngalesi isikhathi ngoba kuyabe kugcwele udaka ezibayeni.
“Okubangela umkhuhlane lo yikuthi izifuyo ziyabe zesinyathela amaxhaphozi kanye lokuhlala ezibayeni ezilamadaka okwenza amasondo azo abe buthakathaka lokhu kwenza ukuthi amagcikwane angene phakathi kwamasondo.
“Amagcikwane la agoqela i-bacteroides nodous, fusobacterium le-necrophorum aphambanisa lapho okungena khona ukudla,” kuchasisa uNkszn Jakarasi.
Imbuzi
“Okutshengisa ukuthi izifuyo sezihlaselwe ngumkhuhlane lo yikuthi ziyabe seziqhula unyawo olulodwa loba zonke, sezisidla zihlezi ngamadolo, sezilobuvila bokuhamba, zingaba loqhuqho, umzimba wehle ngenxa yokungadli kuhle,” kuchasisa uNksn Jakarasi.
Abalimi bezifuyo bangavikela umkhuhlane lo ngokwekela ukuhlalisa izifuyo zabo ezibayeni ezigcwele amadaka.
“Sikhuthaza abalimi ukuthi kufanele bafulele izibaya zabo njalo
bakhweze izibaya zabo okuzavikela ukuthi izifuyo zabo zime edakeni iloba okugcwele khona amanzi.
“Nxa izifuyo sezilomkhuhlane lo, zingelatshwa ngokuzidibhisa inyawo ku-copper sulphate solution, iZinc sulphate solution iloba i7% iodine solution njalo nxa sezinikwe imithi le ziyabe sezimele zisuswe edakeni zihanjiswe lapho okome khona, ziphiwe ukudla zize zibengcono,” kuphetha uNkszn Jakarasi.
