uMthunywa
Arnold Ndlovu
INHLANGANISO ekhangela ngezokulima iPlant Quarantine Services ikhuthaza abalimi ukuthi bavikele izilimo zabo kuzibungwana ezibizwa ngokuthi ngama-fruitfly ngoba ziyingozi.
Ekhuluma lentatheli yephephandaba likazulu uNkosazana Cynthia Magasha ukhuthaze abalimi ukuthi basinanzelele kakhulu ngoba singaphambanisa isivuno sabo.
Isibungu lesi sihlasela izilimo esinjengotshinda lezithelo ezifana lamahalantshisi kanye lamanantshisi.
“Thina njengenhlanganiso ekhangela ngezokulima kulezibungwana esesizinanzelele ezihlasela izilimo. Ama-fruitfly aluhlupho njalo sesithole indlela abangavikela ngayo izilimo lezithelo zabo ezibungwini lezi.
“Umonakalo omnengi ezithelweni umhlaba wonke jikelele udalwa ngama-fruitfly njalo wehlisela abalimi inzuzo,” kuchasisa uNkszn Magasha.
“Abalimi balakho ukuvikela izithelo kuzibungwana lezi ngokusebenzisa i-Chempac bucket. I-Chempac bucket ligabha elisetshenziswa ukugola izibungu lezi.
“Phakathi liyabe lifakwe imithi i-methyl eugenol kanye le-liquid mercaptothian. Imithi le efakwe phakathi kwamagabha lawa ihuga ikakhulu izibungwana lezi eziduna. Lezi zibungwana zingangena phakathi kwegabha ziyafa okuyindlela yokwehlisa ukumemetheka kwezibungwana lezi ngoba nxa eziduna sezifile akula kuzalana lokwanda,” kuchaza uNkszn Magasha.
Uqhubekele phambili wathi eyinye indlela abalimi abangayisebenzisa ukwehlisa izibungwana lezi yikusebenzisa iM3 Bait Station eyindlela yokubulala izibungwana lezi ezinsikazi.
“Ukusebenzisa i-M3 Bait Station kuyancedisa ngoba yona ibulala kakhulu ama-fruitfly ansikazi, imitshina le iyafakwa ukudla okuhuga izibungwana lezi ezinsikazi njalo zingezwa umnuko wokudla lokhu ziyangena emagabheni lawa zihle zife,” kuchaza uNkszn Magasha.
Uchaze lokuba ukusebenzisa amagabha la alemithi le akubulali imvelo ngoba kukhangelana lesibungu okusifakelweyo.
“Indlela lezi zindlela ezisebenza kuhle ngoba zibulala kuphela izibungu lezi ezihlasela izilimo. Imvelo kanye lezilimo aziphanjaniswa yindlela le ngakho sikhuthaza abalimi ukuthi bazisebenzise,” kuphetha uNkszn Magasha.
