uMthunywa
Langelihle Moyo
INKAMPANI yeFarm and City ebona ngezokufuya isixwayise abafuyileyo ngemithi abangayisebenzisa ekuvikeleni imikhuhlane etshiyeneyo kuziyo zabo.
UMnumzana Itai Shambambeva onguVeterinary Consultant eFarm and City, uthe abafuye inkomo lembuzi kumele bavikele izifuyo zabo kumikhuhlane egoqela i-liver fluke, milk worm lama-tape worm.
“Abafuye inkomo zenyama, nanzelelani ukuthi inkomo zenu azihlaselwa yisibungu lesi okuthiwa yi-liver fluke.
“Isibungu lesi siyingozi enkomeni. Nxa inkomo isihlaselwe yilesi isibungu ibonakala ngoboya sobumile njalo sobuphephuka. Kwesinye isikhathi nxa inkomo isihlinziwe, isibindi sayo siyabe sigcwele izibungu yikho okubizwa kuthiwe yi-liver fluke.
“Ukuze umlimi avikele lumkhuhlane kunkomo kanye lembuzi zakhe kumele abone ukuthi zithola imithi lamajekiseni ngemva kwenyanga ezintathu. Izibungu lezi ezibangela i-liver fluke izifuyo zizithola emadlelweni nxa zisidla.
“Omunye umkhuhlane oluhlupho ikakhulu ngesikhathi sezulu ubizwa ngokuthi yi-tapeworm, lowu ubangelwa ngamanzi esithi ngesilungu yi-water-borne infection, ngakho abafuyileyo sibaxwayisa ukuthi badoze inkomo zabo izulu lingakani,” “Ngemva kwenyanga ezintathu izifuyo kuyadingeka ukuba zidozwe kumbe zihlatshwe amajekiseni okuyikho okuzazenza zihlale ziqinile zingahlaselwa yimikhuhlane,” kutsho uMnu Shambambeva.
Uphethe ngokuxwayisa abalimi ukuthi bazame ukunanzelela imbuzi lazo ziqakathekile.