uMthunywa
Ncekwenhle Ncube
ABALIMI sebecebiswe ukuthi balimuke isikhwekhwe kanye lentwala embuzini zabo njengoba izulu lilinengi kulezinsuku.
UMnumzana Khulani Sibanda ongumlisi kunhlanganiso yeAgritex esigabeni seGwanda uthe abalimi kumele baqine ngokudibhisa imbuzi zabo ukuze benqabele isikhwekhwe lentwala.
UMnu Sibanda uveze ukuthi imbuzi ziyawesaba amanzi njalo aziwathandi kungakho zinganethwa zithwala nzima ngoba zicina zisiba lesikhwekhwe emzimbeni.
Isikhwekhwe lesi senza ukuthi imbuzi zizenwaye emidulini kumbe ezihlahleni besezisubuka kuchince igazi.
“Intwala zande ukuhlupha imbuzi ezibe lesikhwekhe. Intwala ithanda lapho okubuthakathaka ngoba kuba lula ukuthi zimunye igazi.
“Kungakho sikhuthaza abalimi ukuthi kufanele badibhise imbuzi zabo ngomhlobo wedibha elibizwa kuthiwa yi-deadline. Idibha le ithelwa eqolo beselisehla ngomzimba lisiya phansi,” kutsho uMnu Sibanda.
Uthe abalimi kumele njalo babone ukuthi izibaya zembuzi zifulelwe ukuze zinganethwa lizulu. Lokhu njalo kuyavikela amazinyane emqandweni.
Uqhubekele phambili esithi abalimi balakho njalo ukusebenzisa i-foot dip ukulwisa intwala ezifuyweni lezi.
“Abalimi bangenza ama-foot dip. okungumhlobo wedibha ofakwa emnyango ukuze nxa imbuzi kumbe izimvu zisedlula zinyathele ngenyawo zazo ukuze imikhaza esemasondweni ife,” kutsho uMnu Sibanda.
Uphethe ngokuthi umlimi ulakho ukubona ukuthi imbuzi zakhe sezihlaselwe yimikhaza nxa ziqhula.
“Imbuzi zilakho ukubonakala ziqhula ngenxa yemikhaza ebomvu ehlala phakathi kwamasondo azo yikho nje sikhuthaza ukuthi abalimi basebenzise i-foot dip,” kuphetha uMnu Sibanda.
