uMthunywa
Ethel Ncube
UMHLABELELI kaMaskandi uZinjaziyamluma kawuvali umlomo kulandela ukukhethwa ukuthi ayedibana labahlabeleli beSouth Africa kuMother of All Maskandi Festival ngoMgqibelo kuyonale iviki.
UZinjaziyamluma odabuka eTsholotsho ukhangelelwe ukuthi ayedibana labanye abaculi bakaMaskandi beSouth Africa eMoses Mabhida Stadium.
Umhlabeleli ucine ehlezi kunamba 8 kuhlandla lokucina lokuvotelwa esuka ku-28.
UZinjaziyamluma uthe kungathi liphupho kodwa iqiniso yikuthi kasoze adanise abalandeli bakhe.
“Kangikwazi lokuthi ngithini, kodwa ngiyajabula ngokukhethwa ukuba ngingene kuTop 30. Ngiyabonga ngokuphiwa ithuba lokuthi ngiyetshengisa ukuba ngiphetheni kuMaskandi.
“Ukukhethwa kwami akutsho ukuthi ngokwami kodwa ngokwesizwe sethu sonke seZimbabwe, ngoba ngiyabe ngisiyaphakamisa ifulegi yekhaya.
“Ukungena kwami eMabhida Stadium ngisiya esitikini labaculi beMzansi kuveza ukuba imisebenzi yami iyabonakala njalo kubuye kuphakamise labaculi bakithi,” nguZinjaziyamluma lowo.
“Kasibuquthi lequla lami, siyalungiselela kasidlali. Ngifisa konke kuhambe kuhle siyephakululela abalandeli bakaMaskandi bonke abazabe bethe gwaqa ukudla kwamehlo,” kuchaza uZinjaziyamluma.
Uqhubekele phambili ebonga abaculi labalandeli ngokumsekela.
“Ngethula isibongo esikhulu kubalandeli labaculi lakuye wonke umuntu owangivotelayo ngithi qhubekani livota lingadinwa impumela izaphuma ngoMgqibelo.
“Ngiyabonga imisebenzi yenu abanengi bayinkakhasela qhubekani lingivotela sithembe ukuba ngizanqoba,” kuphetha uZinja.
