uMthunywa
Nkosilathi Sibanda
ABALANDELI beqembu leHighlanders sebexwayise unozinti weqembu leHwange ukuthi livimbe okuzwayo ngoba lingazibona lisesula inyembezi zobuhlungu bokuhlohlwa kanengi ngeSonto.
Zombili zihlangana kumdlalo weligi yeCastle Lager enkundleni yeBarbourfields ngeSonto.
Kubikwa ukuthi unozinti weHwange uNedrick Madeya ulimele, kodwa abeHighlanders abalandaba lakho nanko bathe unozinti lo uzakhala encedisana labanye bakhe, aze esule inyembezi ngethawulo lakhe.
UMadeya usedume ngethawulo lakhe elimhlophe nke angena lalo enkundleni, okucatshengelwa ukuthi yilo elimnikeza idlabuzane.
Okwenza ithawulo leli liphathwe emlonyeni yisehlakalo esavela mhla iHwange idlala leDynamos eBarbourfields. UMadeya “wethusela” ngokuchaya ithawulo lakhe eceleni kwegedi leHwange, qede lapho waguqa phezu kwalo wakhuleka. Lokhu akuzange kujabulise abalandeli beDeMbare, okwenza omunye wabo wadonsa ithawulo leli walitshisa.
Kumdlalo wangeSonto, indaba yethawulo izaphathwa emlonyeni loba uMadeya ebika ukuba uyabe engekho.
Abalandeli beTshilamoya abaxoxisane lephephandaba likazulu baveze ukuba abazwisisi ukuthi kungani unozinti weHwange evusa insolo ngethawulo lakhe.
“Okusalayo sizabahlohla amabhola amanengi. Asikhethi ukuthi ithawulo likhona kumbe alikho,” kutsho uJason ‘SamaNki’ Siwela umlandeli weHighlanders.
“Umdlalo wenguqu wahlelwa ukuthi uthokozise abantu. Nxa sesikhuluma ngokwenziwa ngabadlali abafana loMadeya, singathi yikukholisisa abantu loba nje abanye bethu bekubona njengokuthi ithawulo lilomuthi. Ukukholwa kwethu kutshiyene.”
UThabiso “Gundu” Dube ongusomabhizimusi enzikini yakoBulawayo osekela iBosso uthe ukholelwa ekuthini uMadeya uyesabile ukuzomelana leHighlanders.
“IHwange ngabanye bethu, ngabafana bekhaya kodwa sizayidla,” kutsho uDube.
“Ngiphose ngahleka ngisizwa ukuthi walimala uMadeya kodwa ngamzwela sengikubala kumaphephandaba. Kwesinye isikhathi abadlali labaqeqetshi babo basuka besiqilibezele ngokuthi umdlali thile ulimele besenzela ukuthi isitha singalungiseleli ngokuqina.”
Iqembu leHwange ngoMvulo libike ukuba unozinti walo kunye labanye abadlali bazabe bengekho emdlalweni. Omunye umdlali okukhanya elimele nguBrighton Makopa.
Umqeqetshi weChipangano uNation Dube, ekhuluma lentatheli yephephandaba likazulu, uthe bazangena eBarbourfields bengethuki lutho njalo ukulimala kukaMadeya akusoke kutshintshe iqembu.
“Umdlalo uzaqhubeka. Abadlali abalimeleyo sisabakhangelisisa, angeke sigxile kulokhu kuphela ngoba okuqakathekileyo yikunqoba,” kutsho uDube.
