uMthunywa
NJENGOBA abadala bethi inyathi ibuzwa kwabaphambili lokhu kusuka kugcwaliseke ngephephandaba likazulu elidume ngezimnandi ngakho ezimnandi zibuzwa kulo. Angithi nje kule iviki lize lejaha elicula iHip-hop kuvungame umphathi. Kalinandisi nje lelijaha ungathi lazalwa licula mdabuko.
Lelijaha elidume ngezimnandi angithi nguNkosinhle Mthabisi Mhlanga oyaziwa ngokuthi nguReedz nxa sesenza adume ngakho kwezomculo. Othanda ukuncinda injabulo kule iviki nansi ingxoxo enambithekayo phakathi komculi wodumo uNkosinhle Mhlanga (NM) lentatheli yephephandaba likazulu uCornelius Luphahla (CL).
CL: Umphakathi uthanda ukwazi ukuthi ngubani uReedz njalo waqala nini ezokujabulisa uzulu?
NM: Mina ngakhulela elokitshini leCowdray Park edolobheni lakoBulawayo ngabuya ngafunda khona kwathi izifundo zami zeSecondary ngaziqhuba eSizani High School. Ezokucula ngaziqala ngesikhathi ngisafunda eSizani noma nje ngangingakaziwa emphakathini njengomculi. Lapha sasisacula singabafundi nje ngenxa yesifiso sokuba ngabaculi.
Kwathi ngesikhathi ngiqeda uFomu 4 ngo2015 ngaqala-ke ukucula okulohlonzi oluphezulu sengingene kuqembu leKontrol Tribe elilabaculi abalitshumi kugoqela loCalvin.
CL: Lokhe waqala ukucula sowakhipha amadlalade amangaki jahelibanzi?
NM: Njengomculi osanda ukusungula sengakhipha idlalade elilodwa engalikhipha ngo2016 elithi Road to Success.
Ngabuya njalo ngancedisana leqembu lethu leKontrol Tribe sakhipha idlalade elithi Under Kontrol.
CL: Abantu bathini ngomsebenzi wakho wobuculi lo owenzayo mfokaKhebesi njalo ukhangelele ukubenzelani lonyaka?
NM: Abantu bayawujabulela umsebenzi wami kakhulu sibili njalo bangikhuthaza ukuthi ngingadeli ukucula ngiqhubekele phambili ngibajabulisa. Ngalokhu-ke ngikhangelele ukubakhiphela elinye idlalade lomhlaba ekuqaleni komnyaka ozayo. Leli dlalade ngisalipheka okwamanje ngakho ngithi uzulu kalindele ezimnandi kuphela.
Okunye njalo ekuqaleni komnyaka ozayo ngizabe ngivakatshela uzulu ngimtshayela ingoma zami mahala nje ngomkhankaso wami othiwa yiKasi to Kasi Tour. Lokhu ngizakuqala emalokitshini agoqela iCowdray Park, Luveve kanye leGwabalanda.
CL: Uzulu uthanda ukwazi ukuthi uvame ukutshayela ngaphi ingoma zakho jahalakthi?
NM: Ingoma zami ngivame ukuzitshayela kuma-shows, emitshadweni, emadilini okuzalwa kanye lakweminye imikhosi etshiyeneyo nje. Emikhosini le ngiyamenywa ngabahleli bayo ukuthi ngizojabulisa umphakathi.
CL: Bunzima bani oyake uhlangane labo njengomculi njalo nkuthazo bani oyipha abaculi abasasungula?
NM: Ubunzima engiyake ngihlangane labo njengomculi yikuthi abanye abaculi kabathandi ukuthi uthuthuke kwezomculo, basuka bale ukukusiza nxa udinga usizo lwabo njengabaculi abadala.
Okunye njalo yikuthi abantu bayantshontsha umculo wami okusuka kubenzima ukuthi ngithuthuke kwezomculo ngoba basuka bawuthengise ngentengo ephansi kuthi nxa sengiwuthengisa abantu bangawuthengi ngoba sebelawo.
Okunye njalo okungikhathazayo njengomculi yikuthi abantu bayasimema emikhosini etshiyeneyo bethi sizojabulisa uzulu sivumelane ukuthi bazasibonga ekucineni kodwa baphethe besala ukusibonga. Lokhu kwenza singathuthuki njengabaculi abasasungula.
Kubaculi abasasungula ngibakhuthaza ukuthi bangadeli ukujabulisa uzulu njalo kabahloniphe babekwazi ukuthi kwezomculo inyathi ibuzwa kwabaphambili. Okunye njalo ngithi kubo umsebenzi wokucula unzima ngakho nxa bengabaculi kabasebenzise iziphiwo zabo bengaze baculela ukuthola udumo kuphela.
