uMthunywa
Ethel Ncube
IJAHA eliphuma eTsholotsho eselazakhela udumo kweleMzansi Afrika lakuleli elazakala kakhulu ngokuthi DJ Mapressa, selipheke imidlalo emibili yamahlaya ngenhloso yokuthokozisa abantu.
UPromise Sibanda owazakala ngokuthi nguDj Mapressa, njengomuyi uPaul Matavire wenza izimanga kundima yezokuhlabelela kunye leyokuhlekisa nanko usepheke imidlalo emibili ejabulisa uzulu ukuze azikholisele ngesikhathi echitha isizungu.
Paul Matavire
UMthunywa uxhumane lo DJ Mapressa oveze ukuba uyawuthakazelela umsebenzi wakhe wokujabulisa uzulu.
“Mina ngithanda ukubona abantu bezijabulela njalo bebobotheka kungakho ngabona kufanele ukuthi ngingene kundima yokulingisa ngikholisise abantu ngemidlalo ehlekisayo.
“Ngo2019 ngakhipha umdlalo wami wakuqala olesihloko esithi ‘Umalayitsha weTsholotsho’. Lo umdlalo wami wangijabulisa kakhulu ngoba wathengwa ngenye indlela engingakaze ngiyibone.
“Umuntu owaqala ukuwuthenga nguNdumiso Sibanda owawuthenga ngeR10 000 elandelwa nguMamba Ndlovu owawuthenga ngeR5000 ngosuku engethula ngalo umdlalo okwangenza ngabonga abakithi,” kutsho uDj Mapressa.
Uqhubekele phambili eveza ukuba kundima yezemidlalo uqhuba kuhle kakhulu.
“NgoNcwabakazi ngizethulela abalandeli bami umdlalo abazawujabulela kakhulu olesihloko esithi ‘Inzipho zikaSathane’. Kungakho ngithi kubalandeli bami lingadinwa ngokungilandela. Khathesi ngibizwe nguDr Mzo Mkhehlelezi lapho engikhangelele ukukhangisa imotsha yabo okukhomba ukuthi leSouth Africa lakho ngilabalandeli abangijabulelayo,” kutsho uDj Mapressa.
UDj Mapressa wenza amahlaya kumikhosi eyehlukeneyo loba eyedwa.
