uMthunywa
Ethel Ncube
IQEMBU leNsimbi zeZhwane lizavakatshela eBotswana ngoNkwenkwezi lapho elizaba lomcimbi wakuqala lokhe lasungulwayo.
INsimbi zeZhwane ziyabe ziqala ukuphatha umcimbi elizweni laseBotswana.
UMthunywa uxhumane lomaneja uBahlanu Sibanda oveze ukuthaba okukhulu ngokuyatshaya komakhelwane.
“Siyajabula njengeqembu ukuba sithole ithuba lokuyanandisa elizweni laseBotswana. Amalungiselelo wonke ahamba kuhle, sikhangelele ukuthi siyephakulela abantu baseBotswana ukudla kwamehlo,” kubika uBahlanu.
Uqhubekele phambili eveza ukuba iqembu lakhe lizazama konke okusemandleni alo ukuba uzulu waseBotswana akholise.
“Sisebenza gadalala ukuba siyekwethula umsebenzi olohlonzi oluphezulu komakhelwane, esilethemba lokuthi bazakholisa kanye lathi.
“Ingoma zethu ezintsha ezisanda kuphuma khathesi lazo sizaziphakulela abalandeli emcimbini wethu.
“Sicela ukuba lisixhase lonke eliseBotswana, labobonke abenelisa ukuhamba besuka endaweni ezitshiyeneyo, sondelani eduze lizobona abafana benu besenza abadume ngakho,” kuphetha uBahlanu.
