uMthunywa
Buhlebenkosi Gaule
INKAMPANI yeGrain Marketing Board (GMB) isiqalisile ukuqoqa umumbu kubalimi endaweni ezitshiyeneyo ngenhloso yokuwugcina esiphaleni selizwe ukuze kwaziwe ukuthi kulokudla okunganani elizweni.
Kubikwa lonyaka ithani eyodwa yomumbu ithengwa ngemali engange$390.
UMnumzana Emmanuel Sithole oyisikhulimi seGMB ubike ukuba abalimi endaweni ezehlukeneyo sebeqalisile ukubathengisela isivuno sabo somumbu.
“Lonyaka njengeGMB sizimisele ukuthenga umumbu wabalimi ngemali engange-$390 ithani yinye ngayinye njalo imali le siyibhadala ngemva kwensuku ezilitshumi kusiya kutshumi lanye,” kutsho uMnu Sithole.
Uqhubekele phambili esithi umumbu osusesiphaleni selizwe kanye lalowo abakhangelele ukuthi ulethwe ngamankampani azimeleyo uyenela ilizwe kuze kufike isigaba esizayo sokuvuna.
“Loba abalimi sebeqalile ukuletha umumbu eGMB silamacebo okuncedisana lamankampani azimeleyo ukuze kube lomumbu ozenela abantu beZimbabwe kuze kuyefika isikhathi sesivuno somnyaka ozayo,” kutsho uMnu Sithole.
Isikhulumi seGMB siphethe ngokucebisa abalimi ukuba bazilethele umumbu wabo eGMB, bengathumeli abantu ngoba bebaqila.
“Sixwayisa abalimi ukuba bangathumeli abantu ukuba babalethele umumbu kithi ngoba bacina bengatholi inzuzo ngoba labobantu bayabaqila,” kuphetha uMnu Sithole.
