uMthunywa
UYAZISOLA ngokunikela ngengane yakhe, unina womfundi okuthiwa utshone ngemva kokubhaxabulwa ngesihluku ebotshwe izandla lenyawo ngumfundisi webandla lamaZayoni, eNzimakwe ePort Edward.
UMnumzana S’the Mbali (40) okuthiwa ungumfundisi ebandleni lamaZayoni, uvele eNkantolo kaMantshi, ngemva kokuthi ebotshwe ngeSonto eledluleyo ngecala lokubulala, awokuzama ukubulala lawokutshaya ngenhloso yokulimaza.
Kulesi sehlakalo kutshone uThozama Sonjica (13) obefunda uGrade 9 esikolo seBheki High, kwathi abangane bakhe abane abaleminyaka ephakathi kwe-15 le-18, baphuthunyiswa emtholampilo belimele.
Ngesikhathi intatheli ihambele lumdeni, unina kaThozama, uNkosikazi Thandazile Jula obekhulunyelwa yindodakazi yakhe uNkosazana Phindile Jula, uthe uyazisola ngokuvumela ukuthi umfundisi athathe indodakazi yakhe ayihlukumeze ngoba kuthiwa ikhitshwa amadimoni.
“Akukho ebesike sakuqaphela kuThozama obekungenza sithi ubengenwe ngamadimoni.
Ngobusuku athathwe ngabo, bese silele, kwaqoqoda umfundisi ethi uzomlanda ukuze ayothandazelwa ngemva kokuba oyedwa wabafundi abebethandazelwa, ethe amadimoni wawafakwa nguye ngokumbhoboza indlebe emfaka amacici.
“Umama uvukile wahamba laye uThozama lomfundisi okuyilapho afice abanye betshaywa benathiswa amanzi alesawudo lamatshe.
Lokhu kwenzakale izinsuku ezine zonke, kanti lomama ubekhona,” kutsho uNkszn Jula.
Kuthiwa umfundisi uthethe izingane wazivalela okwensuku ezine zitshaywa, zinathiswa isiwasho zinganikwa lokudla, okuthe ngokubona ukuthi uThozama ulamandla, wambopha izandla lenyawo eqhubeka ngokumtshaya ethi akakhiphe inombolo yobumnyama asebenza ngayo.
Ku-vidiyo eshuthwe ngudadewabo kamufi, umufi ubonakala emabokoboko, ehlaliswe phansi, uzwakala esevuma ukuthi udla izibindi zabantu.
UMnumzana Mxolisi Jula olilunga lomdeni aphinde abe ngukhansela endaweni le, uthe lesi senzo sibatshaqisile.
Uthe ukutshona kukaThozama kwaholela ekutheni abanye ayelabo bakhululwe.
UNgqongqoshe woMnyango wezokuThuthukiswa koMphakathi uNkkz Nonhlanhla Khoza ubehambele umdeni kamufi, ukhuze abazali ngokunikela ngezingane zabo.
“Kuyishwa ukuthi abantu okufanele ngabe bavikela izingane okubalwa leSonto, yibo abathinteka kulesi sehlakalo.
Sifuna kubotshwe bonke abathinteka kulesi senzo sokuhlukumeza lokubulala ngesihluku,” kutsho uNkkz Khoza.
Uqinisekise ukuthi abafundi abane bagcinwe endaweni ephephileyo.
Ilunga lomphakathi elikhulume leSolezwe elingathandanga ukuvezwa, lithe abagilwa bekuyizingane ezihlupha njengezinye ezisakhula kungekho okusolisayo ukuthi kungaze kuthiwe zilamadimoni.
“Bezizihambela labafana zizinathela uma kungezona izinsuku zesikolo njengazo zonke izingane ezikhulayo. Akukho okuthusayo ebezikwenza,” utsho kanje.
Iphini likathishomkhulu esikoleni, uNkkz Nawe Mavundla, lithe akukho abake bakuqaphela izingane bezifunda ngokwejwayelekile kungekho okusolisayo.
Inkosi yesizwe uBhekisizwe Nzimakwe isisolile lesi senzo.
Okhulumela amapholisa eKwaZulu-Natal uBrigadier Jay Naicker
Okhulumela amapholisa eKwaZulu-Natal uBrigadier Jay Naicker, uthe amapholisa efika endaweni yesehlakalo, atshelwa ukuthi umgilwa uzibulele ngenxa yamadimoni okuthe uma kwenziwa uphenyo kwabotshwa umsolwa.
-Isolezwe
