uMthunywa
Ethel Ncube
UMHLABELELI odumileyo we-rhumba koNtuthu usebikele abalandeli bakhe ukuba useqalile ukupheka elinye idlalade elitsha lerhumba.
UMandlenkosi Godolude Mpofu ubikele intatheli ukuba umculo wakhe uyatshisa nanko useqalile ukupheka elinye idlalade elitsha elizaphuma maduzane nxa seliphelile.
Ekhuluma lentatheli uMandla owazakala ngokuthi nguGodolude ubike ukuba kabuyeli muva kodwa uyaphambili ngomculo wakhe.
“Mina ngaqala ukuhlabela ngo-2018 lapho engakhupha khona idlalade elithi Impilo luhambo elilengoma eziyisikhombisa, ngaphinda futhi ngakhipha i-single track ethi omalayitsha.
Umfanekiso lo uthethwe kuShutterstock
“Ngo-2019 ngakhupha idlalade elithi Dlalelani khatshana elilengoma ezingu-6, 2020 ngakhupha elinye idlalade elithi Suk’emva kwami elilengoma eziyisikhombisa, 2021 ngakhupha elithi Sphundu awulamehlo elilengoma eziyisikhombisa, kuthi ngo2022 ngakhupha ingoma eziyisikhombisa ezilesihloko esithi i-Target lalo lilengoma eziyisikhombisa. Idlalade lika-2023 lisaphekwa khathesi lizaphuma nje maduzane.
“Ekuhlabeleni lapha angihambi ngedwa, ngilabo abangincedisayo abatshaya ikatari nguMawaya Moyo, Nanseric Mfakazi Sibanda, Benedictine Beberto Mguni loPride Ndazula Gumbo abagidayo nguSimon Mantengwane Ncube, Melusi Moyo, Washington Ngwenya loSphamandla Ndebele.
“Silamantombazana labo abagidayo kodwa sibabiza ngesikhathi ukuthi basincedise,” kubika uGodolude.
Uqhubekele phambili eveza ukuba abalandeli bakhe ababekezele.
“Abalandeli bami ngiyalibonga lonke ngokulandela umculo wami ngithi bekezelani kukhona okusaphekwa okomculo. Lonyaka sizabe silezikipa lamakepesi edlalade elitsha kungakho lingadlaleli khatshana kodwa lisondele eduze ukuze lizikholisile umculo ngowenu,” kuphetha uGodolude.
