uMthunywa
YiNtatheli kaMthunywa
SEKUVELE imbiko yokuba umqeqetshi weHighlanders uErol Akbay useveze ukuthi uzatshiya umsebenzi kuleliqembu nxa lingehluleka ukuthi livuselele usekelo lwemali lebhanga leBancABC kusizini ezayo.
UMthunywa uzwe ngokugcweleyo ngabafakzi abaqotho abakuleliqembu njalo beseduzane laluumqeqetshi ukuthi uselungiselela ‘‘ukukhalala’’ ukukhuza iBosso ngenxa yamahungahunga okuthi iqembu alilamali yokuholisa izisebenzi ngesizini ezayo.
Isivumelwano seBosso lebhanga leBancABC siphela mhlaka 31 kulinyanga, kodwa iphephandaba likazulu lizwe ukuthi amaqembu wombili akakahlali phansi kuqaliswe ezinye ingxoxo mayelana lokunikezwa imali. Ibhanga leli yilo elibhadala iholo labadlali, izisebenzi kanye lempilakahle ka-Akbay.
Umqeqetshi lo ofike wabayisithandwa kubalandeli abanengi ukhangelelwe ukuthi abuyele kibo eHolland kukhefu leKhisimusi aze ayophenduka kuleli ngoMbimbitho. Kubikwa ukuthi ngeke aphinde abonakale nxa iBosso ingela sekelo lwemali olucacayo.
Okuqale kuyinkulumo phakathi kukaAkbay labangane bakhe kuphange kwaba yikudla kwentatheli ngoLwesithathu ekuseni. UAkbay olekhontileka emvumela ukukhuza iBosso okweminyaka emithathu, kuzwakale ukuthi ubike ukuba usevalweni lokuthi uzacina engasaholi.
“Ngiya eHolland ngiphenduka ngoMbimbitho. Nxa iHighlanders ingehluleka ukuthola usekelo, angibuyi,” ngamazwi ka-Akbay la.
NgoLwesithathu iphephandaba likazulu liphange layafika emawofisini eHighlanders ukuyadinga umbiko wenkokheli ngalokhu.
UModern Ngwenya obambe isikhundla sikaMgcinisihlalo uthe:
“Lawo ngamanga aluhlaza tshoko. Umqeqetshi wethu uErol Akbay usesekhona njalo uzabekhona langomnyaka ozayo. Labo abathi ubike ngokusuka kuHighlanders ngabantu abayizitha zeqembu abafuna ukubhidliza ithimu.
“UAkbay wazikhulumela yedwa ukuthi kakaze athole iqembu elilesiphatho njengeHighlanders. Abalandeli kumele bakwazi ukuthi umqeqetshi ngowethu njalo ukhululekile,” kutsho uNgwenya.
Kudletshana olukhitshwa ngabafakazi abaqotho baloludaba, kuvela ukuthi inkokheli zeqembu zizabamba udaba lokukhulumisana leBancABC ngemva komcimbi weHighlanders wokunikeza abadlali bayo izicoco.
Kunjalo nje, inkokheli zeTshilamoya ziphethe umthwalo wokuthi zincenge uAkbay engabi lemcabango yokufulathela ngoba umqeqetshi lo ulikhuze kuhle iqembu ekuqaleni kwesizini yaze yayaphetha noma nje kwehlule ukuthi babezintshantshu.
Kolunye udaba kuHighlanders, uMthunywa ubika ngokukhululeka ukuthi ngeviki ezayo izembe lingakhala kwabanye abadlali abakhulu njengoba amajongosi etshengise ukuthi umfolo asewazi ewuqonda kulandela ukuqhunqisa izibambamalahle zeHwange ngeviki yokucina kuligi.
