uMthunywa
Thokozile Mbedzi loBlessing Moyo
UMCULI osacathula kuleli uThuli Sithimbili ubika ukuba ufisa ukuthi umculo wakhe waziwe ngabantu abanengi ngoba ufuna ukufinyelela izinga laphezulu.
Umhlabeleli lo uke waduma kakhulu ngengoma yakhe ethi Imali yegwayi lenye ethi Lendoda esiqhunswe kanenginengi emsakazweni weSkyz Metro FM. Ingoma le ihlale isikhathi eside ilokhe ikhokhela kumncintiswano wezingoma kulumsakazo.
USithimbili, oleminyaka engamatshumi amathathu lambili yokuzalwa, uqale ukuhlabela ngomnyaka ka-2012. Uselengoma ezintathu njalo uzimisele ukwethula idlalade lakhe lakuqala ngoNkwekwezi kuwonalo umnyaka.
Umfanekiso lo uthethwe kuShutterstock
Ubikele uMthunywa ukuba yena udinga ukuxhaswa ngokunxuswa emcimbini yabahlabeleli ukuze abantu babemazi mathupha.
“Ngaqala ukuhlabela ngomnyaka ka2021 lapho engakhipha ingoma yami yakuqala ethi Lendoda ngasengikhipha ezinye ezimbili. Ingoma lezi ziyatholakala ebulenjini emakhasini eYoutube lakuFacebook ku-@thuliSithimbili. Engikudingayo kakhulu njengomhlabeleli osakhulayo ngama-live shows ukuze abantu bebengazi benelise ukulandela ingoma zami ngoba sebengazi,” kutsho umculi lo.
“Ngesikhathi ngiqala ukuhlabela abantu bebengangazi njalo abanye bekusiba nzima ukuthi bangilandele ngoba bengakaze bengibone.
“Thina sihlabelela abantu ngakho engakutsho kwabanye bami abasacathulayo yikuthi bahlabele okufunwa ngabantu, okunye njalo bengalahli ithemba ngesikhathi bebona ubunzima kabaqinisele kuzakhanya phambili.”
