uMthunywa
Thokozile Mbedzi
AZILANKANI izakhamizi zeNtalale eGwanda ngemva kokuba elinye inina lixhonxwe ka-14 ngengqamu ngumkalo kubangwa ukuthi kungani lingasafuni ukuphenduka emzini wabo.
Inkemenkeme le yenzakele kuyonale inyanga lapho uApolonia Mhene agwazwe khona ngumkakhe uDash Dube oleminyaka yokuzalwa engu-27 wesigabeni sePelele.
Kuzwakale ukuthi ngemva kokwenza isiga lesi uDube wadliwa ngumswenya.
Ekhuluma lentatheli kaMthunywa uSobhuku wakulindawo uMnumzana Joel Mhene Ncube onguyisemkhulu njalo kaApolonia uveze ukuthi ulokudana ngesiga esenzakale esigabeni sakhe njalo esenzakalele emzini wakhe.
“Ngimadolonzima ngesiga esenzakeleyo lapha esigabeni sami njalo emzini wami. Bengizilalele ngisehlisa amadino ngoba besilele emfeni ngaphaphama sengivuswa ngabazukulu besithi uApolonia usebulawa ngumkakhe.
Kukhanya umzukulu wami wathi ebona ukuthi umkakhe ujonge ukumbulala wahle wabaleka waqonda emzini wami.
“Lakhathesi ngisaphambene ngoba engikubonileyo angikaze ngikubone sengize ngimdala nginje ukuthi umuntu ubalesibindi sokuhlaba omunye kanenginengi igazi ligeleze enganaki kodwa aqhubeke kuze kube ngamahlandla angu-14,” kuchaza usobhuku uNcube ngelodanileyo.
“Angenelisi lutho, loba ngikhuluma nje ngidabukile ngaphakathi ngoba ngiyakuqala njalo ngikholwa ngiyakucina okunje.
Bengithi loba ngivala amehlo bengibona isimo umzukulu wami ayekuso,” kutsho usobhuku uNcube.
Uqhubekele phambili njalo esithi umfana lo uvele ukhanya ulohlupho.
“Umfana lo kukhanya ulohlupho ngoba waphunyuka eGoli abantu befuna ukumtshisa ngamathaya waya eBotswana lakho kwaba yiso leso waphenduka ekhaya.
“Umzukulu wami ukuthi abe elokhu ephila sibonga uMdali ngoba ubengakhangeleki. Sikhuluma nje ulokhu esesibhedlela.Isikhulumi samapholisa esabelweni seMatabeleland South uInspector Philisani Ndebele ebuzwa ngodaba lolu uthe lufikile ehofisini yabo kodwa soludluliselwe emthethwandaba.
“Udaba lomuntu ogwazwe walimala ngumkakhe lufikile ehofisini yethu kodwa sesiludlulisele emthethwandaba,” kuphetha uInsp Ndebele.
