uMthunywa
Thokozile Mbedzi
KULENDODA ehlala enzikini yedolobho lakoBulawayo emangalise uzulu ngokubhidliza iphinde itshise impahla zonke endlini izondele ukuthi umkayo sethole umsebenzi.
UMapurani Chari oleminyaka engu-53 uthe efika endlini unkosikazi wakhe oleminyaka engu-42 wamazisa ukuba usethole umsebenzi kwesinye isitolo. Kubikwa uChari akuzange kumphathe kuhle lokhu, waqala wadobha ihloka waqala ukubhidliza impahla yendlini ngapha esithi uyatshisa indlu.
Ekhuluma lentatheli kaMthunywa uNkosazana Shylet Mzizi uthe uChari wathi efika endlini umkakhe wamtshela indaba ezimnandi zokuba usethole umsebenzi.
lnspector Abedinico Ncube
“Lokhu akuzange kumphathe kuhle kungakho waqala ukuhlahlela impahla yendlini ngehloka andubana aqale ukuthetha athi usetshisa impahla zonke.
“Unkosikazi wakhe waqala ethi mhlawumbe uyasoma kodwa wananzelela ukuba kabuyeli emuva uqhubeka ebulala impahla futhi esithi uyazitshisa.
“Umsindo lo udonse kwaze kwaba phakathi kobusuku unkosikazi wakhe ebona elokhu ebhidliza impahla wasuka wayabikela amapholisa kanti kabuzanga elangeni uthe ephenduka lawo wathola indlu isisitsha,” kutsho uNkszn Mzizi.
Isikhulumi samapholisa koBulawayo ulnspector Abedinico Ncube ebuzwa ngodaba lolu uvumile wathi solufikile ehofisini yabo.
