uMthunywa
Listen Ndlovu
KUFE indoda eleminyaka engu-42 ngemva kokuba itshaywe ngamadoda amabili kubangwa isibane (i-torch).
Isiga lesi senzakale mhlaka 19 Nkwenkwezi ngezikhathi zika-8 ntambama esiqintini seMutemeri ngaphansi kwenduna uNhema eShurugwi.
i-torch
Kubikwa izelamani, uWellington loGodknows Mada balanda uDouglas Mafuta bethi utshontshele umngane wabo ithotshi. Kwaba lokungazwisisani phakathi kwabo, laba ababili basebedobha izigodo baqala ukutshaya uDouglas umzimba wonke.
Kulandela ukutshaywa lokhu, mhlaka 25 Nkwenkwezi isimo sikaMafuta saba sibi okwabangela ukuba athwalelwe esibhedlela seShurugwi District Hospital lapho afika wadluliselwa esibhedlela seGweru Provincial Hospital lapho abhubhela khona mhlaka 30.
Isikhulumi samapholisa eMidlands uInspector Emmanuel Mahoko uthe amapholisa achwayisisa mayelana lokufa kwendoda eleminyaka engu-42 yesigabeni seMutemeri eShurugwi.
“Sidingisisa ngokubulawa kwendoda esigabeni seMutemeri, sicela njalo umphakathi ongabe elolwazi ukuba abetheswacala bangaphi abikele amapholisa aseduzane laye.
uInspector Emmanuel Mahoko
“Sixwayisa umphakathi ukuthi uqakathekise ukulungisisa indaba ngokuxoxisana hatshi ngokulwa,” kutsho uInsp Mahoko.
