uMthunywa
Blessing Moyo
ABALIMI baxwayiswa ukuthi bavikele imbhida yabo ekutshazweni ngumqando ngokufaka utshani ezivandeni zabo ukuze ithole ukukhudumala njalo ngokuya kwesikhathi lobo tshani buba ngumquba owenza imbhida ikhule kuhle.
Ekhuluma lentatheli kaMthunywa uNkosazana Treggy Mpofu oyincitshi kwezokulima kugatsha lweAgritex uthe utshani buyanceda kakhulu embhideni ngoba ngesikhathi somqando benza umbhida ukhudumale.
“Umbhida uyafa kwesinye isikhathi ubulawa ngumqando ngakho-ke abalimi bengawuvikela emqandweni ngokweluka utshani bube licansi babufake ethangweni ukuze isilimo lesi singatshazwa,” kuchaza uNkszn Mpofu.
Agritex
“Utshani lobu ngesikhathi sokutshisa nxa umlimi angathelela isivande sakhe buyavalela ilanga ukuze lingatshisi amanzi ngakho utshani buqakathekile ukuba umlimi ahlale ebufaka ngesikhathi sokutshisa kanye langesikhathi somqando.
Uqhubekele phambili esithi utshani bungabola buba ngumquba omuhle kakhulu.
“Utshani lobo buba ngumquba omuhle bungabola, okwenza umlimi abe lenzuzo enhle embhideni ngoba uyabe usulamahlamvu amakhulu.
“Abalimi kumele bekuqakathekise kakhulu ukuthi kumele bekhiphe ukhula lapho abahlanyele khona isilimo ngoba ukhula buyabe buncintisana ekudleni lesilimo okubangela ukuthi sicine siswaba ngenxa yokuswela ukudla okwaneleyo.”
Uphethe ngokuthi abalimi kumele baqhubeke bethelela izivande zabo bengayekethisi.
