uMthunywa
Gladmore Ncube
KULOMAKOROKOZA wesiqintini seTshatshani eKezi otshiye izakhamizi zinkemile kulandela ukuthumba uninazala amcele ucansi.
Umakorokoza lo, uObrien Mpofu kubikwa uthumbe uninazala, uNkosazana Thelma Ndlovu ngeviki ephelileyo emsola ngokuthi uvumela indodakazi yakhe ayithetheyo, uBrigdet Dlamini ukuthi akokotshe njalo aye emacansini lamanye amakorokoza emabhawa.
Intatheli ikhulumisane loMpofu ngaloludaba obikele iphephandaba ukuthi yena kaboni cala ngalokhu akwenzileyo ngoba ubefuna ukufundisa uninazala isifundo.
“Kuhle ukuthi angiphe lami ucansi umamazala ngoba nguye ovumela umntanakhe ukuthi alale engekho esiyamdingela imali mina ngisemsebenzini ebutsheketsheni ubusuku bonke ukuthi belale izisu zibomvu lonina.
“Kukanengi ngisizwa ukuthi unkosikazi wami usethunywa ngunina ukuthi ayelala kwabanye omakorokoza abalemali kulami ukuze bamuphe imali.
“Umsebenzi wesikorokoza lo kawulula ngoba kungenzeka ukuthi kuphele amaviki amabili ngingatholanga lutho kodwa lokho akutsho ukuthi umfazi sekumele aphume endlini ayelala edinga imali ngendlela engayisiyo engiyangisa kwabanye abantu esisebenza sonke.
“Okwenze ngacela ucansi kumamazala yikuthi ngithe ngivela emsebenzini ngathola unkosikazi engekho njalo ngezwa ukuthi lapho ayekhona uthunywe ngumamazala ukuthi ayedinga imali ngocansi.
Yikho nje ngibone kungcono ngithi yena angiphe ucansi njengoba lonkosikazi wami sekhethe ukuthi alunike abanye,” kuveza uMnu Mpofu.
Iphephandaba likhulumisane njalo loNkosazana Mpofu ngaloludaba othe okwenziwa ngumkhwenyana wakhe kazange akuthande ngitsho lakancane ngoba nguye owafundisa umkakhe ukungena emabhawa.
“Wangimangalisa kakhulu umkhwenyana aze angithathe angivalele endlini yabo yokulala esithi ngimuphe ucansi ngoba yimi engithuma umkakhe ukuthi ayeganga.
“Kambe sibili ngiyabe ngingumuntu onjani ongathuma umntanakhe ukuthi ayekwenza ihlazo elinjengaleli. Umkhwenyana nguye owathola umntanami ezilungele wafika wamfundisa utshwala lokugida emabhawa, khathesi sekumhlupha lokhu usegcona mina.
“Akumelanga atshingele mina ngoba mina angingeni emabhawa njalo anginathi tshwala, yena okumele akwenze yikukhulumisana lomkakhe ngoba ngazake ngizingenele ezabo ngoba kuqala ngathi ngibakhuza kwacina sekukhanya angathi mina yimi engibaxabanisayo.
“Okuhle yikuthi wavuka exolisa ekuseni wangibhadala ngembuzi wathi ubedakiwe kodwa engaphinda ubulema obufana lalobu ngiyabaxotsha emzini wami ngibatshayele ihlahla khatshana le,” kuchaza uNkosazana Ndlovu.
Intatheli izamile ukukhulumisana loNkosazana Dlamini ngaloludaba othe kalakho angakutsho kwabamaphephandaba.
“Angila engingakuvezela abamaphephandaba,” kutsho uNkszn Dlamini andubana avale ucingo.
