uMthunywa
Khanyile Ndebele
UTHABE umanzi te umlimi weBubi District esigabeni sako-Nkosikazi kuWadi 16 ngemva kokuthatha isicoco sakuqala kubalimi kumbukiso weZimbabwe International Trade Fair.
Umlimi uNkosikazi Nothani Ngwenya oleminyaka engu-43 yokuzalwa uthethe isicoco sakuqala kubalimi kumbukiso weZimbabwe National Trade Fair obukhona kuviki edluleyo.
Uthe lokhu engakukholwa ukuba nguye obe yintshantshu kubalimi lonyaka ngoba impumela ibuye engayilindelanga.
“Kweminye iminyaka impumela ibivame ukulotshwa kodwa lonyaka lalokhu akade bekukhangela bekwehlukile nanko bebefuna lokwazi ukuthi ungezelela njani uhlonzi lwezilimo i-value addition ozilimileyo.
“Ku-value addition bebekhangela ukuthi ngesilimo osilimileyo wenzeni ngaso. Bekukhangelelwe ukuthi nxa ulime umumbu wenelise ukwenza okuthile ngawo okungaba ngamaputi njalo nxa ulime inyawuthi wenelise ukwenza okuthile ngayo okungaba yi-fulawa.
“Le ingxenye ifakwe kumbukiso walonyaka kungakho lami bengingelaqiniso lokuthi ngingabe ngenze kuhle,” kutsho uNkszn Ngwenya.
Uqhubeke wakhuthaza abanye abalimi ukuthi bangene kumaqembu omncintiswano lo ngoba ungalethela umlimi umvuzo omkhulu.
“Engithanda ukukutsho kwabanye abalimi yikuthi ababuye bazophatheka kumbukiso lo ngoba ukungena kuqembu yiUS$40 kodwa isicoco ositholayo sikhulu kakhulu, ungakhangela khathesi ukuthi ngithole ama-10 khilogilamu enhlanyelo adlula i-10 okutsho ukuba inhlanyelo yami iyadlula i100kg, ngaphinda ngazuza imithi yokufafaza izilimo.
Uphethe ngokuveza ukuthi lokhu kumnike intshukuntshu yokuqhubekela phambili ngomsebenzi wakhe ngoba inzuzo ayithola lapha uzenelisa ukuthi imncedise ukuhlawula imali zesikolo zabantwana iphinde imncedise kokunye.
