uMthunywa
Nkosilathi Sibanda
NGEMVA kokulalela idlalade elitsha lomculi u-Omega “Mkhosi” Ndlovu, kuyavela ukuthi ngempela usetshaye umthambo oyiwo kwezokucula.
Umculi lo, odabuka eZidulini, esiqinitini seBhuka, eNkayi ngaphansi kwenduna uMadliwa sehwatshe idlalade elilengoma eziyisikhombisa, elilesihloko esithi Isiphiwo.
Inengi labalandeli bomculo wakhe lizakholisa ngamaphimbo langeziginci ezikulelidlalade lomculo we-Afro Pop.
UNdlovu, odume ngelithi “Mkhosi”, waziwa kabanzi ngokucula uMaskandi kodwa kulelidlalade wenze obekungacatshangelwa. Usetshaya i-Afro Pop ngendlela ejabulisayo njalo kungaba kuhle nxa engahle aqine ngayo.
Kungoma zakhe ezimbili kulelidlalade, uzihlabele loDr Gosolo. Ingoma lezi ngezithi Isiphiwo loSiyobonana.
Ezinye ingoma ezikudlalade ngezithi Bengikuthanda, Bayangibiza, Umntanami, Alutholakali Lula, Siyabonana, Ababili.
Kungxoxo abelayo lentatheli yephephandaba likazulu, uNdlovu uveze ukuthi nge-Afro Pop ujonge ukuzwisa abathandi bomculo abangakaze bakuzwe.
“Bengicula uMaskandi kodwa sengicabange ukutshintsha igiya ngingene ku-Afro Pop. Inengi labalandeli bami lingamukele njengomculi kaMaskandi. Nanti-ke idlalade elitsha elizajabulisa abantu bakithi. Ngipheke ingoma ezimnandi eziphatha indikimba ezinengi empilweni zethu. Ngilethemba lokuthi ingoma lezi zizathakazelelwa,” kutsho uNdlovu.
Kusenjalo idlalade leli seliqhunswa emisakazweni yakuleli njalo liyamukelwa ngabantu. Lasebulenjini selitshisa lelidlalade. Kukhangelelwe ukuthi kumalanga alandelayo ingoma zikaNdlovu zihambe phambili kunhlelo zomculo emsakazweni ebalisa i-Star FM, Khulumani FM, Radio Zimbabwe leSkyz Metro.
Ngesifiso sakhe, uNdlovu ufuna idlalade lakhe lisabalale kundawo ezinengi kuzabelo zeMatabeleland.
Umculi lo waqala ukuhlabela esakhula. Uthe ithalenta lakhe labonakala ecula enkonzweni.
“Ngaqalisa ukuhlabela ngisesontweni lasesikolo, ngisasemncinyane. Kodwa, ngomnyaka ka-2013, ngasuka ngaya kweleSouth Africa lapho engafika ngathola amathuba okuthi ngiqine ngomculo wami. Ngomnyaka ofanayo ngahlangana labanye abaculi, sabumba iqembu okwakuthiwa yiZothamlilo,” kutsho uNdlovu.
Uthe idlalade lakhe lokuqala esecula eyedwa walikhipha ngo-2014.
“Idlalade lami lakuqala ngelithi Isheleni Lami. Ingoma lezi zamukelwa kakuhle emphakathini njalo kwakungumculo kaMaskandi. Sengike ngacula enkundleni ngincedisana labaculi bodumo eSouth Africa ababalisa uThokozani Langa loBonakele.”
Ngomnyaka ka-2015, wahwatsha njalo elinye idlalade walibiza ngokuthi Kwangenza Ukufa. Lapha wayehlabela ngezehlakalo ezizwisa ubuhlungu kulandela ukudlula emhlabeni kwabazali bakhe.
Waphenduka eZimbabwe ngo-2016 ukuze azoqinisa umculo wakhe ekhaya.
“Ukuphenduka ekhaya akuzange kwabalula ngoba kwakufana lokuqala phansi. Abantu bakithi kwakungathi kabawuzwisisi umculo kaMaskandi ngoba becabanga ukuthi ngumculo weSouth Africa.”
Uthe ithuba lavuleka ngomnyaka ofanayo wenelisa ukuthi acule emcimbini weBumba Arts Festival.
Waba lenhlanhla uNdlovu nanko waqanjwa kumbango wesicoco seSkyz Metro FM Music Awards (SKYMAS) ngengoma ethi Zagobhoza.Omega Mkhosi Ndlovu
