uMthunywa
UZABUYELA ngoMvulo enkantolo yeMelmoth utitsha (51) okuthiwa wakhulelisa umfundi (13) ka-Grade 8 wabe esemnathisa amaphilisi okukhipha isisu engazi.
Utitsha ofundisa kwesinye isikolo eMkhindini, kuthiwa walutha ingane ukuthi ikholwe ukuthi bayathandana kusukela ngoNhlolanja. Ngenxa yalokhu ubesiya emacansini lomfundi.
Ekuqaleni kwenyanga umfundi ukhale ngezinhlungu ayezizwa esiswini kanti usezithwele. Wabe sebikela utitsha ngobuhlungu ayebuzwa.
Utitsha wabe esemnika amaphilisi ethi azothiba izinhlungu ayezizwa.
Umfundi kuthiwa ube esegula kakhulu wagijinyiselwa esibhedlela, kwatholakala ukuthi amaphilisi awanathisiweyo kwakungawokukhipha isisu.
Uyise womfundi uthe ufuna utitsha angadedelwa ngebheyili futhi athole isigwebo esinzima ngakwenzileyo.
“Kumanje ngikhuluma lawe ngitshaqekile ngoba bengingalindele ukuthi umuntu omdala kangaka ongutitsha angenza into efana lale.
Besingazi ukuthi ingane ikhulelwe, mina bebengifihlele. Ngithole sekwenzekele ngoba esegula ukuthi ubelezinyanga ezimbili ezithwele.
Esikufunayo singumdeni yikuthi njengoba kuzoyiwa enkantolo ngoMvulo angayitholi ibheyili futhi agcinwe ejezile ngento ayenzileyo.”
Uthe yize ingane yakhe iphazamisekile ngenxa yalokhu okuyivelele kodwa iyaqhubeka ngesikolo.
Okhulumela amapholisa KwaZulu-Natal, uCaptain Nqobile Gwala, uthe utitsha ubotshwe ngoMpandula mhlaka 13 wavela enkantolo ngoMvulo.
“Umsolwa uvele enkantolo yeMelmoth ngecala lokudlwengula umfundi oleminyaka engu-13 wesikolo abesebenza kuso lelinye elokuzama ukubulala. Icala lidluliselwe phambili ukuze afake isicelo sebheyili. Usagcinwe esitokisini,” kutsho uCaptain Gwala.
Icala liphenywa luphiko leShowe oluphenya amacala athinta udlame lomdeni, awokuvikelwa kwezingane lawocansi.
