uMthunywa
Ethel Ncube
UMLOBI odumileyo koBulawayo uMihla Tsheza Sitsha usekhuphe ugwalo olutsha lwabafundi abakubanga lakuqala kumfundo yaphezulu.
USitsha ulobe ugwalo oluthi Inotho yesiNdebele elizancedisa abafundi ukuba bazwisise izifundo zesiNdebele.
UMthunywa uxhumane lomlobi lo obike ukuba ugwalo lwakhe seluphelile njalo luzancedisa abafundi kuzifundo zabo zesiNdebele.
“Sengilobe ugwalo olutsha engikhangelele ukuthi luphathise kakhulu abafundi abaqala ibanga lemfundo yaphezulu. Kungwalo lolu kulamasiko esiNdebeleni engifisa ukuthi abafundi bawazwisise besanda kuqala imfundo yaphezulu.
“Ugwalo lwami lolu lulezahluko ezingu-30 ezithinta kakhulu iNew Curriculum. Luzancedisa abafundi ukuba bazwisise ulimi lwesiNdebele,” kulandisa uSitsha.
Uqhubekele phambili eveza ukuba ukhangelele ukuba ugwalo lolu luzenza abafundi baphatheke kumasiko abo njalo.
“Ngokubala ugwalo lolu, abafundi bazaphatheka kakhulu ekwazini amasiko lamabala aphathelane lokwamasiko. Ngilobe ugwalo lolu ngemva kokunanzelela ukuba kunengi okumele kwenziwe ukuze abantwana bafunde ulimi lamasiko abo.
“Ngithemba ngokuloba ugwalo lolu sengiyidlalile indima yami. Njengomlobi ngifuna ukuthi silondoloze ulimi lwesiNdebele kungakho enye indlela yokululondoloza yikuthi kulotshwe phansi.
“Ukuze ulimi lungatshabalali kumele siqhubekele phambili siloba izingwalo ukuze lezizukulwana zethu ezizayo zithole ibhuku leli zilisebenzise zibe lolwazi ngolimi lamasiko ethu,” kuphetha uSitsha.
Uphethe ngokuthi ukuloba kusegazini lakhe njalo intshukuntshu yokwenza lokhu wayithola kumlobi omdala wezingwalo zesiNdebele uNdabezinhle Sigogo.
