uMthunywa
Ethel Ncube
SEZIKHATHELE izakhamizi zeMangaba eMberengwa ngendoda etshontsha ngozwane nanko phela icine ingena esiphaleni sikaninazala yatshontsha amasaka omumbu yadliwa ngumswenya.
Umetheswacala uMicah Sibanda kubikwa ufike emzini kaninazala ngeviki ephelileyo ehamba ngenqola ebusuku watshontsha amasaka angu-8 omumbu andubana atshayele inqola yakhe.
Kubikwa umsolwa uthe esephambili wehla enqoleni wathatha ihlahla wacitsha ivili lenqola.
Intatheli ixhumane loMnumzana Sifikile Dube oveze ukuba sebethwele nzima ngobusela bukaSibanda.
“USibanda lisela elikhulu njalo kahloniphi ngitsho, utshontsha aze ayetshontsha lakoninazala. Lokhu okwakuviki ephelileyo ngokwesibili etshontshela uninazala oleminyaka engu-96.
“Umkhwenyana lo kukhanya wavuka ebusuku wabopha inqola wafika koninazala belele weqela esiphaleni wathintitha isiphala watshiya umkopo owodwa womumbu.
“Uthe esehamba wazama ukucitsha amavili enqola kodwa kwamehlula. Abantu bathi belandela umzila waqonda emzini wakhe kanye lapho abathola khona amasaka omumbu engakawathululi esemkulwini,” kuveza uMnu Dube.
Uqhubekele phambili eveza ukuba uSibanda abakwabozala kabafuni kumbophisa ngoba eyisihlobo.
“Kukhanya kunyanga ephelileyo watshontsha izulu lavuka linile amavili ahle acitsha wazitshela ukuba kasabanjwa kodwa nango usephindile njalo, ngikhuluma nje abatshontshelweyo sebemthwalele amahloka lemikhonto bathi bafuna ukumqeda ubusela.
Omunye umfakazi ongathandanga ukuqanjwa ngebizo uthe uSibanda esebanjiwe wabhonga kwabancane indawo samuntu oledlozi.
“Esebanjiwe uSibanda ubhonge njengesilwane kwangathi ngumuntu oledlozi abantu bonke babaleka,” kuveza umfakazi lo.
Iphephandaba likazulu lixhumane lelinye ilunga lemuli yakoninazala kaSibanda eliveze ukudabuka ngobusela bomkhwenyana wabo.
“Umkhwenyana lo usesehlule, khona ngowangaphi umkhwenyana ongena esiphaleni sakoninazala? Lokhu yikudlula.
“Kutsho ukuthi uzacina ebulala ugogo embulalela impahla zakhe,” kuchaza ilunga lemuli leli.
UMthunywa uxhumane lepholisa likasobhuku uMnumzana Liba Phiri ovumileyo ukuba udaba lokutshontshwa kwamabele lwafika kuye.
“Umbiko womkhwenyana ocatshangelwa ukuba utshontshela uninazala wafika kimi kodwa udaba lwakhona alucacanga kuhle lwaphelela emoyeni,” kuphetha uMnu Phiri.
Imizamo yokuxhumana lometheswacala uSibanda yehlule ngoba engelaye umakhalekhukhwini.
