uMthunywa
Thokozile Mbedzi
KULOSANE olulenyanga ezine lwesiqintini seMayabhodo esigabeni seThekwane ePlumtree olutshele endlini ngempelaviki edluleyo ngemva kokuqhamuka komlilo lulele.
Umuyi uSandile Dube kubikwa watshiywa ngunina uBridget Moyo (23), lomnewabo oleminyaka eyisikhombisa esiyakukha amanzi.
Omunye umakhelwane uMnumzana Thabo Ngwenya uthe behlulekile ukumnceda umntwana.
“Silokhe silesithuli ngendlela umntwana lo abhubhe ngayo ngoba asizange senelise ukumsiza ngoba umlilo ulavuke ngamandla. Umntwana obesele laye mncane, kodwa sibonga ukuthi wenelisile ukuphuma azise omakhelwane.
“Sathi sisiyafika umlilo ubuvele usumkhulu njalo umntwana ehlaba umkhosi phakathi kodwa kungasela mzamo esingawenza ukuthi singene simkhiphe phakathi. Kukhanya i-solar yiyo ebangele ingozi yomlilo lo,” kuchasisa uMnu Ngwenya.
Uqhubekele phambili esithi bacina besenelisa kodwa ukucitsha umlilo lo.
Isikhulumi samapholisa esabelweni seMatabeleland South uChief Inspector Philisani Ndebele ebuzwa ngodaba lolu uvumile wathi solufikile ehofisini yabo andubana axwayise uzulu ukuthi engabotshiya abantwana bebodwa kungela obakhangeleyo.
“Udaba losane olutshele endlini solufikile ehofisini yethu, sithanda ukuphinda sixwayise uzulu ukuthi angatshiyi abantwana bebodwa. Kumele sonke isikhathi kube lomuntu omdala obakhangeleyo ukuze kuvikelwe ingozi ezingacina zibangela ukulahleka kwempilo,” njalo kuphetha uChief Insp Ndebele.
