uMthunywa
Cornelius Luphahla
ZIMADOLONZIMA njalo zididekile izakhamizi zelokitshini leNtumbane ngemva kokuba usane olulomnyaka luwele phakathi komgqomo olamanzi lwafa.
Ingozi le yenzakale ngoMvulo ekuseni kuyonale iviki lapho umuyi owakoNdlovu awele phakathi komgqomo lo obulamanzi amancinyane kanye lezigqoko phakathi.
UNkosazana Nokuthula Tshuma ongunina omncane kamuyi uthe ubekhona kusenzakala ingozi le.
“Mina bengikhona kusenzakala ingozi le njalo lokhu ngithithibele, kangikwazi ukuthi kungabe kuyisilingo bani lesi esisehleleyo njengemuli,” kutsho uNkszn Tshuma.
UNkszn Tshuma uqhubekele phambili njalo walandisa indlela isiga lesi esenzakala ngayo.
“Amanzi aqala abekwa nguMaNgwenya phandle kwendlu ngasengiwachitha wathi engibuza ukuthi ngiwachitheleni ngathi akufanelanga atshiye amanzi phandle nxa kulabantwana abancane endlini. Kuthe kunjalo ngagezisa umntanami ngachitha njalo amanzi ngasengingena endlini sengidinga amasokisi omntwana njengoba wayesiya esikolo.
“Ngathi sengibuyela phandle ngathola umntwana sewele emgqonyeni lo ikhanda liphakathi kwamanzi umzimba uphandle. Ngamkhupha-ke umntwana lo ngisithi mhlawumbe uyaphila ngasengimlalisa phansi ngabiza uMaNgwenya lomkami ukuba bazongibonisa. Ngathi ngimbuza uMaNgwenya ukuthi amanzi la uwatshiyeleni phandle mina ngimtshelile wathi uwakhohliwe ubefuna ukuwatsha,” kuchaza uNkszn Tshuma.
Wengezelele wathi waphanga wayabikela amapholisa engazi ukuthi umntwana sebhubhile esithi mhlawumbe enganceda ngemota umntwana asiwe esibhedlela.
Kubikwa uMaNgwenya owatshiya amanzi emgqonyeni lo okuwele khona umntwana ubesebenza ukukhangela umuyi.
Ngesikhathi uMthunywa efika emzini wakoNdlovu, uMaNgwenya ebengekho kuthiwa wasuka ngelanga lomonakalo esiyadinga imali ayitshontshela unina kamuyi ngeSonto.
Uyisemkhulu womntwana lo obhubhileyo othande ukubizwa ngokuthi nguNdlovu uchaze ukuthi laye kalankani ngale indaba.
“Lokhu ngathwetshulwa yingwe angizake ngikubone okunje, kangilamathe ngilapha. Ukufa komntwana lo kuyangisolisa kakhulu njalo lokhu ngisadingisisa ukuba kungabe kuhambe njani,” kutsho uMnu Ndlovu.
Isikhulumi samapholisa koBulawayo uInspector Precious Simango ebuzwa ngale indaba uthe useyizwile.
“Kuliqiniso sibili ukuthi kulomntwana owele emgqonyeni wafa elokitshini leNtumbane. “Sisahlolisisa ukuthi kuhambe njani,” kuphetha uInsp Simango.
