uMthunywa
UKHALE ngokungalandelwa kwemithetho ebekelwe ukulwisa isifo seCovid-19 kweleSouth Africa umongameli Cyril Ramaphosa ememezela ukuthi ilizwe leli selibuyela esigabeni sesithathu sikathaqa ngoMvulo ebusuku.
UMongameli Ramaphosa wethule inkulumo esizweni kulandela ukwenyuka kwezibalo zabantu abatheleleke ngeCovid-19 elizweni leSouth Africa. Sebengaphezulu kuka 1 million abantu asebeke bahlaselwa yiCovid-19 elizweni lelo.
Ngesikhathi esethula inkulumo yakhe uRamaphosa ukhale ngabantu asebeyekele ukusebenzisa izibulali magcikwane, ukugeza izandla, kanye labantu abangazifakiyo izaheke. Uthe ukungalandelwa kwale imithetho yikho okusabalalalisa ngesiqubu iCovid-19.
URamaphosa uthe kusukela ngoLwesibili ilizwe lelo libuyela esigabeni sesithathu sikathaqa ukuze kwehle izinga lokusabalala kwe-Covid-19.
Isigaba sesithathu sihambisana lokwehliswa kwezibalo zabantu abahambela imicimbi; imingcwabo kumele ihanjelwe ngabantu abangu-50 kuphela. Amabhizimusi kumele abeke izibalo sabantu abazovumeleka ukungena emsebenzini.
Izindawo ezithengisa utshwala zivaliwe kukanti lokunatha utshwala ezindaweni zomphakathi njengasebhishi lasemapaki kuvaliwe. Ukuthutha utshwala lakho kuvaliwe. URamaphosa uthe oNgqongqoshe abayingxenye yeqembu elikhangela ukulwisa iCovid-19 bazachaza kabanzi ngeminye imithetho ethinta isigaba sesithathu.
URamaphosa uthe ilizwe lizahlala esigabeni sesithathu kuze kutshaye uZibandlela 15. Uthe emasontweni azayo bazabhekisisa ukuthi isabalala kangakanani iCovid-19. – Isolezwe.
