uMthunywa
Fairness Moyana
KULENDODA yeDete egogekileyo okubikwa igqekeze omunye umuzi andubana ithuthe impahla ngebhala (wheelbarrow) yazaphenduka njalo ukuzathwala ezinye.
UTerence Moyo kubikwa uleminwe emibili nje esandleni sokudla kodwa ngenxa yokuthi uyindoda elesandla umiswe phambi kukamantshi uSharon Rosemani esetheswa icala lokugqekeza kanye lokweba.
Emiswe phambi kwenkundla ngoMvulo kuyonale iviki umsolwa kubikwa utshiye inkundla ibulawa zimbambo ngemva kokuba ezame ukuzivikela ngokuthi amapholisa ambophe masinyane engakathengisi impahla azebileyo.
“Amapholisa angiphambanisile sibili ngoba angibophe ngisathi ngizakuyathengisa impahla lezi. Bengifuna ukuyazithengisa eBinga lapho engingaziwa khona kodwa amapholisa ahle angibopha ngingakakwenzi lokhu.
Nkosi, bengizama ukuziphilisa nanko phela izinto zimi manzonzo elizweni kodwa ngiyazisola kakhulu ngalokhu engikwenzileyo,” ngumsolwa lo.
Umsolwa ohlala emzini wakhe eJwape, indawo eseDete kubikwa usebenzise ibhala ukuthwala impahla abezebile okubikwa ukuthi zibiza imali engange $1 145.
Umantshi umthole elecala wamgweba ukuthi ayehlala entolongweni okomnyaka owodwa wathi uzakhipha inyanga ezintathu nxa kuyikuthi umsolwa ubhadale umnikazi womuzi imali engange $318.
Inkundla izwe ukuba ngelanga elingaziwayo kodwa eliphakathi kuka 20 Zibandlela lo 1 Nhlolanja lonyaka umsolwa wafika emzini kaTshiyiwe Nyoni wabulala ifasitela wasengena phakathi. Waguduza endlini, weba impahla ezigoqela ingubo, imiqamelo, izitsha zemkulwini, impahla zokugqoka kanye lezikhwama phakathi kokunye.
Wathwala impahla lezi wayazitshiya egangeni wasesiyathatha ibhala endlini yakhe wathwalela impahla ayezitshontshile kowakhe umuzi.
Owananzelela ukuthi umuzi wakoNyoni wawugqekeziwe nguVezigama Ncube owayecelwe ukuthi ayephosa ilihlo emzini lo njengoba kwakungelamuntu.
UNcube kubikwa wabikela amapholisa eCross Dete ucwaningo lwahle lwaqala.
“Mhlaka 15 Nhlolanja amapholisa ezwa ukuthi umsolwa wayelempahla ayezithengisa ahle ayafika emzini wakhe lapho afika athola impahla ezatshontshwa koNyoni emkulwini langaphansi kombheda. UNyoni waziqamba impahla zakhe njalo kubikwa ezatholakalayo zibiza imali eyedlula i$600,” ngumtshutshisi walelicala uTinomupeyi Mbiza lo.
