uMthunywa
Cornelius Luphahla
BEKUNGABIZWA ozwayo edilini lokuthakazelela ilanga lokuzalwa lika Prophet Blessing Chiza ebandleni le-Eagle Life Assembly lapho abantu abaswelayo, abagugileyo kanye labagogekileyo beze ngobunengi babo ukuzahlangana lomkhokheli webandla leli ngoLwesine ngeviki ephelileyo.
UProphet Chiza uthakazelele ilanga lakhe lokuzalwa ngokupha abantu abatshiyeneyo izipho ezigoqela impahla zokugqoka, ukudla, lokunye okunengi njangalokhu ahlala ekwenza minyaka yonke.
Lonyaka uProphet Chiza ubebize njalo abantu abangamakhulu abadabuka endaweni ezitshiyeneyo zelizwe ezigoqela iGwanda, iKezi lePlumtree.
Ekhuluma edilini lakhe uProphet Chiza ubike ukuba ukhetha ukumema abantu abaswelayo kanye labagogekileyo ukuze ajabule labo ngoba kunzima ukuba bathole ithuba lokujabula. Wethule njalo ukuthi uzaqhubekela phambili esiza lababantu, akupheleli kulelidili nje.
“Ngithanda ukujabula lani ngoba inengi lenu lihlala lihlukuluzekile ngendlela ezitshiyeneyo, ngiyafisa ukuthi lijabule lami lamhlanje. Ngithe ngikhuleka ngatshelwa ukuthi ngisazolisiza okwedlulisileyo ngiliphe izipho elizabe lihamba lizithwele ngezinqola kanye lezimota ngoba ziyabe zinengi kakhulu,” kutsho uProphet Chiza.
Uqhubekele phambili wakhuluma ngokuqakatheka kokupha njengalokhu okukhulunywa liBhayibhili elingcwele ethi kuqakathekile njalo ukuba abantu bamazi uThixo ngoba ngaphandle kwakhe akulalutho abangalwenza.
Ubuye wathi umuntu wonke uqakathekile ngaphambi kobuso bukaNkulunkulu kungakho-ke akumelanga kubelobandlululo phakathi kwabantu.
Edilini leli abantu bathokoziswe ngendlela ezitshiyeneyo nanko phela amalunga ebandla leli enze umdlalo omayelana lokuhlukuluzwa kwabantwana abazintandane behlukuluzwa ngabantu abahlala labo. Ngemva kwalokho babuye bachaza ukuba ukuhlukuluzwa kwalababantu kuyinto embi kakhulu ngakho akufanelanga kwenziwe.
Ikhekhe likaProphet Chiza lidliwe nguye wonke umuntu obekulelidili.
Abantu abakade bebuthene kulelididli baphiwe impahla etshiyeneyo egoqela izigqoko, ingubo lokudla okutshiyeneyo okugoqela itshukela, indumba, amafutha okupheka, uchago, onamunede, irayisi, impuphu kanye lokunye okunengi. Baphinde baphiwa njalo isepa yokugeza leyokuwatsha phakathi kokunye.
Omunye umfundisi we Eagle Life Assembly uErnest Zichawo ubike ukuthi kuyo yonke iminyaka uProphet Chiza wenza idili lokuthakazelela ukuzalwa kwakhe lapho anxusa khona abantu abaswelayo abuye abaphe izipho.
“Abantu abalapha bavela endaweni ezitshiyeneyo ezibalisa iGwanda, iKezi, iPlumtree kunye lezinye indawo ezitshiyeneyo.
“Bakhona abantu ababegula kakhulu kuthi abanye ababegogekile asebasiliswayo ngokuza ebandleni leEagle Life Assembly abakade benxuswe kulelidili,” kutsho umfundisi uErnest Zichawo.
Uphethe ngokuthi ngaphandle kokuphiwa izipho ezifana lokudla lezigqoko abantu bathole insindiso kulindawo ngokuba bamukeliswe uJesu Khristu kulelidili.
Idili leli liphelele eLuveve, eNtembeni Old People’s Home, lapho okuhlala khona abantu abagugileyo. Kulindawo uProphet Chiza uphinde njalo wanikeza lumuzi wabagugileyo ukudla, izigqoko kanye lengubo.
