uMthunywa
Blessing Moyo
IJAHA elisakhulayo elihlala eNkulumane koBulawayo selizakhele ibizo ngokupheka inamunede okuthiwa yiBaboab Drink.
Inamunede le, isithengwa kakhulu ezitolo, nanko phela labezempilakahle bathi umkhomo uyasiza emzimbeni.
Baboab Drink
Intatheli kaMthunywa ikhulume loMnumzana Naison Zivanai opheka leli inamunede obike ukuba ibhizimusi lakhe ulisungule ngomnyaka ka2018 esafunda enyuvesi yeNational University of Science and Technology, kodwa walikhulisa ngokugcweleyo ngomnyaka ka2020.
“Ngesikhathi ngisasesikolo, ngo2018 yikho lapho engasungula khona ibhizimusi lami,” kutsho uZivanai.
“Ngakhuthazwa ngabazali bami ukuthi ngivule ibhizimusi leli.”
Uthe okunye okwamfuqayo kwaba yikulandela okwenziwa ngabo somabhizimusi bemalokitshini.
“Okwenza ngafundela ukwenza inamunede leli yikuthi ngakhula ngibona abantu besenza lokho okubizwa ngokuthi ngama-ice lolo, besenza imali. Ngahle ngabona ithuba lokuthi ngenze inamunede lomkhomo, yikho-ke lapho engaqala khona ukwenza iBaboab Drink.”
Usomabhizimusi osakhulayo lo uthe ngenyanga uthengisa amambodlela enamunede lakhe angu-2000.
National University of Science and Technology
Uqhubeke wathi umkhomo uwuthola emaphandleni abalisa eHwange, Binga, lasePlumtree.
“Okwakhathesi ngisaqina ngokuthi ibhizimusi lami lime ngenyawo zonke zombili ngakho amanamunede la ngisawenzela eNkulumane, kodwa libhizimusi elisakhulayo njalo elisemthethweni.
“Sengenelisa ukuthengisa inamunede lami emavinkilini amakhulu afana lakoGreens Supermarkets lakoOceans koBulawayo.”
UMnu Zivanai uthe kukhona abantu phandle kwezitolo abathengisa inamunede lakhe.
“IBaboab Drink uyayithola iyimihlobo emithathu kule original, i-banana le-orange.
“Abantu kumele bathenge iBaboab Drink le ngoba ilokudla okunengi. Iyaqinisa umzimba ngoba ilama- vitamins. Lalabo abahamba e-gym bayithanda kakhulu.
Greens Supermarkets
“Engingakutsho kwabasakhulayo abafuna ukungena kwezebhizimusi yikuthi kabazimisele. Kufuna ukubekezela.”
