uMthunywa
Mthokozisi Dube
UNOZINDABA osacathulayo uWeNyasha Chingono usehwatshe idlalade lakhe lakuqala uMusadzokere Kumashure (Lingabuyeli Emuva).
Umhlabeleli lo odume ngelithi WeNyasha usebenzelane lomhlabeleli odumileyo kwezomculo wokholo uTakesure Zamar Ncube ekuphekeni idlalade leli.
UWeNyasha odabuka edolobheni leGweru uthe uselesikhathi elolonga idlalade leli elilengoma ezimbili leyesithathu ekhala iziginci kuphela. Wethule idlalade leli eGweru ngempelaviki phambi kwabalandeli bomculo wezokholo njalo uthi indlela abantu abamukele ngayo ingoma zakhe iyamthokozisa.
“Kungijabulisile kakhulu ukubona abantu behlabela belandelana lami ngeSonto eGweru.
Ongaziyo ubengathi bayayazi ingoma yami kodwa akekho obeyazi ngoba bengiqala ukuyethula emphakathini,” kutsho uWeNyasha.
Uthi okwamfuqa ukuthi abhale lingoma yikubona amakholwa angasatshengisi uthando lwakuqala kuThixo.
Uphinde wagcizelela ukuthi kwamhlupha kakhulu lokhu ngemva kokubala iBhayibhili kugwalo lukaSambulo.
USambulo 2 vesi 4 othi “Kepha nginalokhu ngawe, ukuthi uluyekile uthando lwakho lwakuqala”.
“UNkulunkulu ufuna ukuthi ngazo zonke izikhathi uthando lwethu ngakuye lube luvutha kodwa ngananzelela ukuthi abanengi besebebuyela emuva. Isifiso sami yikuthi kube lemvuselelo empilweni zabantu nxa belalele idlalade lami,” kulandisa uWeNyasha.
UWeNyasha obhala izindaba eseGweru kwelinye lamaphephandaba alapha eZimbabwe uthe izipho zakhe zombili uzithanda ngokufanayo. Uthe ukhangelele ukuthi akhule ekulobeni izindaba lasekuhlabeleleni lokhu afisa ukuthi kuthinte impilo zabantu kuphinde kulethe inguquko.
Umhlabeleli lo uselomnyaka ogcweleyo lenyanga eziyisikhombisa engunozindaba njalo uthi uyawuthakazelela umsebenzi wakhe.
Loba nje idlalade leli lingelakuqala, uWeNyasha uthe wake wazama ukukhipha elinye ngo2007 kodwa kwehlula.
Idlalade lelo walipha abenye istudiyo eHarare kodwa abazange balithakazelele. Uthe noma nje wadana kazange alahle iphupho lelo.
Uthe lokhu kwamsiza ngoba wabuyela emuva wayadinga ukufunda kakhulu ngezomculo wokholo.
UWeNyasha uhlabela leqembu le Worship Addicts elikhokhelwa nguNcube.
“Ukusebenza loNcube kuyisibusiso kimi ngoba umculo wakhe ujulile kakhulu njalo usufike lezizweni. Kunengi esengikufunde kuye uNcube, ngiyambonga kakhulu ngokungincedisa,” kutsho uWeNyasha.
AmaCD akhe athengiswa kumabandla eHarvest House International lapha eZimbabwe, eBotswana laseSouth Africa.
UWeNyasha uthe usesebenzela ukukhipha elinye njalo idlalade ngemva kokubhala ingoma ezinengi kakhulu.
Uthi waqala ukuhlabela eleminyaka yokuzalwa engamatshumi lanhlanu enkonzweni.
